AS Kigali: bamaze amezi 2 badahembwa, bagiye guhagarika imyitozo
Abakinnyi AS Kigali isanganywe bashobora guhagarika imyitozo muri iki cyumweru kuko bamaze amezi abiri badahembwa
Nyuma yo kuviramo mu matsinda muri ‘AS Kigali Preseason Tournament’ yateguwe n’ikipe yabo, abakinnyi ba AS Kigali bamaze amezi abiri badahembwa ngo bagiye guhagarika imyitozo.
AS Kigali yarangirije ku mwanya wa kane muri shampiyona ishize, ntibyashimishije abayobozi bayo n’ab’umujyi wa Kigali uyitera inkunga, byatumye igura abakinnyi benshi bamenyereye shampiyona banatangira imyitozo mbere y’andi makipe yose.
Abakinnyi bashya AS Kigali yaguze ni; Ndoli Jean Claude, Nshutiyamagara Ismail Kodo, Ntamuhanga Tumaine Tity, Mubumbyi Bernabe na Ndahinduka Michel bita Bugesera bavuye muri APR FC, Nkomezi Alexis wavuye muri Sunrise FC, na Tubane James wavuye muri Rayon Sports.
Mu irushanwa riheruka kurangira ryateguwe n’ikipe yabo baviriyemo mu majonjora. Batsinzwe imikino ibiri (na APR FC na AS Vita Club), banganya umwe na Dauphin Noirs.
Amakuru Umuseke ukesha umwe muri aba bakinnyi bashya muri AS Kigali aremeza ko bashobora guhagarika imyitozo kuko batahawe amafaranga ya ‘Recruitment’ basinyiye, kandi ikipe yose imaze amezi abiri badahembwa.
Team Manager akaba n’umuvugizi wa AS Kigali, Nshimiye Joseph yabwiye Umuseke ko iki kibazo kibahangayikishije kandi ko bagomba kugikemura mu maguru mashya.
Nshimiye yagize ati: “Abakinnyi bashya siko bose batarahabwa amafaranga yabo ya Recruitment kuko hari abo twahaye igice nka ba Kabange Twite. Kandi ibibazo by’imishahara itarabonekeye igihe turabizi ko gihari ariko iminsi ishize twari twashyize imbaraga mu irushanwa twateguye bisa nk’ibidindiza imibereho y’ikipe yacu. Ngiye kuganira n’abakinnyi ubu, mbabwire ko tugomba gukemura ibibazo byabo mu maguru mashya.”
Uyu muyobozi avuga ko ibi mu gihe Kabange Twite we yahisemo guhagarika imyitozo kugera bamuhaye amafaranga ye yose.
Gusa abandi bakinnyi nabo ngo bashobora kureka akazi mu gihe batabishyura muri iki cyumweru.
Roben NGABO
UM– USEKE.RW
English
8 Comments
nibabishyure tuzirebere champiyona iryoshe, Kuko APR ntizongera guhangana gusa na Gasenyi, ahubwo AS Kigali (APR B) NIYO BIZAJYA BIRYOHA. Uyu wo sinzajya nywusiba ndakabagwa.
Ngo nibwo bizaryoha? hahaha abafana batanu se( APR hamwe na AS Kigali) baryoshya umupira? Iyo wita Gasenyi iramutse ihagaze nabi, umupira urabiha.
None se ayo makipe ya leta nayo ntahemebera ku gihe?
erega iyi ngo ni AS Kigali bazayifatanye na APR bakore ikipe imwe n’ubundi byose ni imisoro yacu.
Ni hatari kabisa niba n’iyi kipe ifitwe n’Umujyi wa Kigali, ni ukuvuga Leta n’ingengo y’imari, nayo idahembera abakinnyi bayo igihe! None se ayo batanze muri pre-season ko ari menshi iyo bayireka bakishyura ibyo birarane byose?
ehhh urebye twagize akazi kenshi mutin uku kwezi kd urebye abakinnyi bacu ntacyo babaye ,ndumva kuwa 4 bizaba byakemutse ntakibazo …bakomeze barye umunyu ……
biyemeraga bakora pre-season badahemba ! burya koko ngo
nta mukene urya iroti
Hahhh.ubwo c wise umujyi wa kigali umukene nimisoro ihaba ubwo uturere twomucyaro twavuga iki? Ahubwo wabashinja kutaba inyangamugayo zokudasoza ibyo biyemeje
Ngaho namwe nimunyumvire.Mbega ubwiyemezi,ugategura irushanwa abazarikina badahembwa?!Ni igisebo gikomeye.Bisa no gusiga ibyawe bita imitemeri ukajya guofundikira iby’abandi!!
Comments are closed.