Rusizi: Abamotari bahaye inka n’ubufasha abarokotse Jenoside batishoboye

Ihuriro ry’abamotari bo mu karere ka Rusizi kuri uyu wa gatanu ryahaye imiryango itatu yarokotse Jenoside itishoboye inka amati n’amafaranga byo kubafasha imibereho yabo isanzwe itaboroheye kubera ingaruka za Jenoside yakorewe Abatutsi.

François Xavier Mahoro uhagarariye iri huriro ry’abamotari yabwiye Umuseke ko inkunga batanze ari iyo bishatsemo kandi bashatse kuyigenera imiryango yari ifite abayo bishwe muri Jenoside yakorewe Abatutsi batwaraga moto nkabo.

Mahoro yavuze ko inkunga batanze uyu munsi idahambaye ariko ivuye mu bushobozi bwabo kandi no ku mutima w’abagize ihuriro bumvikanye kuri iki gikorwa cyiza cyo gufasha abagihura n’ingaruka za Jenoside yakorewe Abatutsi.

Domitile Uzamushaka w’imyaka 70 yahawe amabati 3o yo gusana inzu ye iva, avuga ko ashimiye aba bamotari kuko n’umuhungu we wari ufite imyaka 26 akicwa muri Jenoside yari ageze igihe nk’icy’aba cyo gufasha nyina imibereho.

Uzamushaka ati “nshimiye cyane abatanze uyu musanzu ndizera neza ko Imana izampa n’ibiti byo kubakisha.”

Beatrice Mukantabana we yahawe inka yo kumufasha kurera abana afite yavuze ko ari ibyishimo bikomeye kuko kuva yapfakara muri Jenoside yagowe cyane n’ubuzima kugeza ubu.

Mukantabana ati “Iyi nka izampa agafumbire ndetse n’amata mbaje guhinga neza no guha abana amata. Ndashimira cyana aba bantu ibyo bankoreye.”

Gervais Ntivuguruzwa umuyobozi w’Umurenge wa Kamembe yavuze ko ibyakozwe n’aba bamotari ari igikorwa cyiza cyo gufasha ubuyobozi kwita ku barokotse Jenoside batishoboye kuko ngo muri uyu murenge banafitemo benshi bagikeneye gufashwa.

Aba bamotari batanze inkunga y’amabati 30, inyana y’inzungu banaha umukobwa warokotse ari impfubyi itishoboye igishoro cy’amafaranga ibihumbi ijana ngo akomeze igishoro cy’ibihumbi 25 gusa yari afite mu bucuruzi bw’inkweto.

Francois Nelson NIYIBIZI
UM– USEKE.RW/Rusizi