Perezida Kagame yasabye urubyiruko kutorohera uwashaka kugirira nabi igihugu

Kuri iki cyumweru, Perezida Kagame yaganiriye n’itorero ry’abanyeshuri bahagarariye abandi baturutse muri za kaminuza zitandukanye maze abaganirira ko ikigamijwe mu itorero ari ukubibutsa ikiranga abanyarwanda, aho bakomoka n’umuco wabo maze bakabishingiraho bateza imbere igihugu cyabo mu buryo bunyuranye.

Perezida Kagame yabwiye uru rubyiruko ko u Rwanda ari ruto koko ariko Abanyarwanda badatekereza ibito, ahubwo batekereza iterambere rinini kandi ryagutse cyane.

Avuga ko icya mbere na mbere ari ukumenya uwo uri we nk’umunyarwanda, ubundi ugateza imbere igihugu cyawe ukitangira.

Yabwiye uru rubyiruko ko rufite imbaraga nyinshi cyane ariko ko niba rutazikoresheje neza zihinduka impfabusa.

Asaba urubyiruko gukoresha imbuga nkoranyambaga

Yabwiye uru rubyiruko ko niba rufite ibitekerezo byiza ku gihugu cyarwo rudakwiye kubisinziriza ahubwo rwanabigaragariza ku mbuga nkoranyambaga.

Avuga ko nta ukwiye kureberera abashaka gusenya ibyo u Rwanda ruri kubaka.

Ati “Abasenya ibyo abantu bubabatse, ukabishyira hasi! Oya! Nakumerera nabi rwose.”

Asaba uru rubyiruko ko buri wese atekereza icyo yakora ngo arengere igihugu cye, avuga ko n’abagisebya bari hanze yacyo ngo hari umurongo batarenga.

Ati “igihe utarenga kuri uwo murongo ndakwihorera ukipfusha ubusa, igihe ugeze kuri uwo murongo ntabwo uzamenya icyagukubise.”

Yabwiye uru rubyiruko ko umwanya rufite utagomba gupfa ubusa, ko bakwiye kuwukoresha biteza imbere.

Abasaba kugira ubumwe no gufatanya mu kwihangira imirimo, kongera umusaruro w’ibyo bakora ndetse n’abari ku ishuri ngo bagahora batekereza ibifite akamaro ntibapfushe umwanya wabo ubusa.

Intore INTAGAMBURUZWA ryaganiriye na Perezida Kagame ni urubyirko 2 090, abakobwa 680 n’abahungu 1 410,  mu byo batojwe harimo gukunda igihugu, kwanga ubuhemu, kwihangira imirimo, amateka n’umuco, ikinyabupfura, imikoro ngiro n’ibindi.

Daddy SADIKI RUBANGURA
UM– USEKE.RW