Rio: Francine NIYONSABA w’i Burundi yegukanye umudari wa ‘silver’

Kuwa gatandatu mu gusiganwa 800m mu bagore kuri Final, umurundikazi Francine Niyonsaba yabaye uwa kabiri yegukana umudali wa Silver akoresheje 1:56.49, uyu niwo mudari igihugu cye kibashije kuvana muri iyi mikino Olympiques isozwa none muri Brazil.

Francine Niyonsaba yabaye uwa kabiri inyuma y’umunyafrika y’epfo Caster Semenya wakoresheje 1:55.28 nawe akaba ariwo mudari wa mbere afashe muri iyi mikino muri 2016.

Uwabaye uwa gatatu ni umunyeKenyakazi Margaret Wambui wakoresheje 1:56.89. Abanyafrica benshi bakurikirana iyi mikino bakaba bashimiye cyane aba bakobwa basize abandi bose basiganwaga bagahesha Africa icyubahiro.

Aba bakobwa mu kwiruka 800m mubagore banavanyeho umuhigo wari uriho wo kuziruka mu 1.58’15’’.

Francine Niyonsaba wahesheje ishema u Burundi afite imyaka 23 akaba ari we usanzwe ufite umuhigo i Burundi wo kwiruka 800m mu gihe kingana 1:58.67 i Rio akaba yongereye uyu muhigo mu gihugu cye avanaho amasegonda abiri.

Muri uyu mwaka mu marushanwa aheruka kubera muri Poland ya World Indoor Championships yegukanye umudari wa zahabu mu kwiruka 800m mu bagore.

Ibihugu bya Africa bivanye imidari i Rio de Janeiro ni;
Kenya (12, harimo 5 ya zahabu )
South Africa (10, harimo 2 ya zahabu)
Ethiopia (7, harimo umwe wa zahabu)
Cote d’Ivoire (2, umwe wa zahabu)
Algeria (2 ya silver)
Burundi (1 wa silver)
Niger (1 wa silver)
Misiri (3 ya bronze)
Tunisia (3 ya bronze)
Maroc (1 wa bronze)
Nigeria (1 uwa bronze)

Ibindi bihugu bya Africa bivuyeyo amara masa.

UM– USEKE.RW