Iradukunda ahuje ‘agent’ na Santi Cazorla wa Arsenal

Iradukunda Inky ukina muri Aspire Academy  yo muri Senegal yasinye amasezerano na ‘agent’ wa Santiago González Cazorla ukina muri Arsenal y’i Londres.

Iradukunda Inky bita Inky Peba ufite imyaka 15 amaze imyaka ibiri yiga mu ishuri ry’umupira w’amaguru rya FC Barcelona, Aspire Academy yo  muri Senegal.

Uyu mwana uvuka i Mburabuturo ya Gikondo yagiye muri Aspire Academy muri 2014.

Bitewe no kwitwara neza yamaze gusinya amasezerano n’umunya-Espagne ushakira abakinnyi amakipe witwa  Amadeo Rangel, ukorana n’abakinnyi bazwi nka Santi Cazorla wa Arsenal na Giovani dos Santos wakiniye FC Barcelone na Tottenham, ubu uri muri Los Angeles Galaxy yo muri USA.

Iradukunda Inky yabwiye Umuseke ko ari intambwe ikomeye ateye.

“Hariya tuba turi abana benshi, buri mwaka haza aba agents bagasinyana amasezerano n’abana, iyo bagejeje imyaka 18 babafasha gushaka amakipe akomeye i Burayi. Nk’uyu mwaka hari bagenzi bacu batatu bagiye muri Barcelone, bane bagiye muri Anderlecht mu Bubiligi, abandi bajya bihugu nka Bulgarie, Danemark n’ahandi.

Nanjye mbere yo kuza mu Rwanda mu kiruhuko nagize amahirwe akomeye. Abatoza bacu banshyize ku rutonde rw’abagomba gusinya amasezerano n’aba agent. Njye nasinyanye n’uwitwa Amadeo Rangel. Niwe ushakira ba Cazorla wo muri Arsenal amakipe, nizeye ko azamfasha kugera mu ikipe ikomeye ninkura.” – Iradukunda Inky

Uyu mwana uri mu Rwanda mu kiruhuko, azasubira muri Senegal tariki mu 21 Nzeri 2016.

Ikipe ye izaba itangiye kwitegura amarushanwa ahuza amashuri y’umupira w’amaguru akomeye ku isi, ‘Kass International Cup’izabera muri Qatar mu Ukuboza.

Roben NGABO
UM– USEKE .RW