Kirehe FC izamutse mu kiciro cya mbere. Abafana bamwe bafunzwe

Akarere ka Kirehe bwa mbere ubu gafite ikipe izakina shampionat y’ikiciro cya mbere mu mupira w’amaguru, ni nyuma y’umukino wo kwishyura urangiye mu kanya Etoile de l’Est ntibashe kwishyura ibitego bibiri yatsindiwe i Nyakarambi ku cyumweru gishize. Kirehe ihise ibona ticket yo kuzamuka.

Umukino ubanza Kirehe FC yari yatsinze Etoile de l’Est ibitego bibiri ku busa, uyu munsi ku kibuga cya Paroisse Etoile yatsinze igitego kimwe ku busa bityo isigara ityo.

Wari umukino w’ishiraniro, ishyaka ryari ryinshi cyane ku mpande zombi mu gice cya mbere Tresor Muhoza yaboneye ikipe ya Etoile igitego cya mbere igice cya mbere kirangira gutyo.

Mu gice cya kabiri amakipe yombi yasatiranye ariko Etoile yari iri mu rugo ikarushaho ndetse inabona uburyo bwo gutsinda bumwe ariko amahirwe akaba macye.

Muri iki gice ariko umukinnyi Jean Bosco Ruboneka wa Etoile de l’Est yahawe ikarita itukura bica intege cyane iyi kipe gusa binarushaho guteza amahane hagati y’abakinnyi.

Nk’uko byagenze ku mukino ubanza, abafana ba Etoile de l’Est bongeye kugaragaza ko abasufuzi bari kubera ikipe ya Kirehe FC kugeza ubwo umukino warangiye hakabaho imirwano.

Abafana ba Etoile biraye mu kibuga bashaka gukubita abakinnyi ba Kirehe FC n’abafana bayo haba imirwano gusa Police ibyitwaramo neza irahoshwa ndetse abafana bane batabwa muri yombi.

Peacemaker Habimana umutoza wungirije wa Kirehe FC (niwe uri gutoza kuko umukuru kuva yakekwaho guhabwa ruswa na Etoile n’ubu ntiyatoje)  yishimye cyane kuba agejeje iyi kipe mu kiciro cya mbere.

Ati “Tuje twiteguye kuguma mu kiciro cya mbere ntabwo tuje ngo tuzahite dusubirayo. Nizeye kandi ko nzakomeza kuba umutoza.”

Amadou Serugendo utoza Etoile we yanze kuvugisha itangazamakuru, gusa Celestin Kalisa uyobora Etoile avuga ko Kirehe yateguye abasifuzi cyane kurusha umukino.

Kalisa ati “twiteguye kuzana izindi ngufu umwaka utaha.”

Ubuyobozi bw’Akarere ka Ngoma bwari buhagarariwe n’ushinzwe umuco n’imikino, abafana ba Etoile de l’Est bakaba bagiye bavuga ko ubuyobozi bw’Akarere butayishyigikira uko bikwiye ngo ige mu kiriciro cya mbere kandi ari ikipe yenda kunganya imyaka na za MukuraVS, Rayon Sports na Kiyovu.

Elia BYUK– USENGE
UM– USEKE.RW/Ngoma