APR ‘yirukanye’ abakinnyi 9 barimo; Ndoli, Bugesera na Kapiteni Kodo

Amakuru agera k’Umuseke aremeza ko APR FC igiye kwirukana abakinnyi icyenda (9) barimo kapiteni wayo Nshutiyamagara Ismail Kodo, n’umunyezamu uyimazemo imyaka 10, Ndoli Jean Claude.

Nyuma yo gutwara ibikombe bya shampiyona bitatu yikurikiranya, ikanuzuza 16 itwaye mu mateka yayo, APR FC ikomeje kwiyubaka, kuko yaguze abakinnyi  barindwi (7) bashya.

Abo yaguze ni: Blaise Itangishaka na Aimable Nsabimana (bavuye muri Marine FC), Innocent Habyarimana na Imran Nshimiyimana (bavuye muri Police FC), Muhadjiri Hakizimana na Twizerimana Onesme (bavuye muri AS Kigali), na Emmanuel Imanishimwe wavuye muri Rayon sports.

Amakuru agera ku Umuseke, aremeza ko aba basore baguzwe bagomba guhabwa umwanya n’abandi bakinnyi icyenda (9) basabwe kwishakira andi makipe ubu birukanwe.

Abo bakinnyi ni:

1. Ndoli Jean Claude
2. Nshutinamagara Ismael bita ‘Kodo’
3. Bukebuke Yannick
4. Ntamuhanga Tumaine ‘Tity’
5. Iradukunda Jean Bertrand
6. Ssentongo Seifi (Ruhinda Farouk)
7. Mubumbyi Bernabe
8. Ndahinduka Michel bita ‘Bugesera’
9. Mugenzi Bienvenue

Bamwe muri aba basore, batangiye kugaragaza agahinda batewe no gusezererwa muri APR FC, nk’uko byagaragaye ku rubuga rwa facebook rwa Iradukunda Bertrand

Abirukanywe, bashobora gusohokera rimwe muri APR FC na Iranzi Jean Claude na Rwatubyaye Abdoul bazakinira MFK Topvar Topolcany yo muri Slovakia.

Ndetse na Bayisenge Emery ushakwa n’amakipe yo muri Morocco, na Kwizera Olivier uzajya muri Baroka FC yo muri South Africa.

Umuseke wagerageje kuvugisha umunyamabanga wa APR FC, akaba n’umuvugizi wayo, Kalisa Adolphe Camarade, avuga ko ibyo gusezerera abakinnyi azabitangaza ejo wa kabiri tariki 27 Nyakanga 2016.

Roben NGABO
UM– USEKE.RW