Rwanda Shima Imana ku nshuro ya gatanu n’abo muri Islam baratumiwe

Igiterane, Rwanda shima Imana ku nshuro ya Gatanu, Abanyarwanda bazahurira kuri Stade Amahoro tariki ya 7 Knama 2016 bashimira Imana ku byo yakoreye u Rwanda n’Abanyarwanda. Muri iki giterane n’ubwo Dr Rick Warren umwe mu batangije iyi gahunda atazaba ahari, ngo abantu benshi bazanoneka kuko n’abo muri Islam baratumiwe.

Muri icyo gikorwa hazaba hari abantu benshi baje gushima ibyo Imana yabakoreye, bizaba birimo no  guhimbaza Imana.

Mu kiganiro n’abanyamakuru Umuyobozi wa PDM-Peace Plan, Mgs Birindabagabo Alexi yavuze ko  bamaze imyaka ine bakora gahunda ya Rwanda Shima Imana.

Muri uyu mwaka bafite intego zigera kuri enye kuri iki giterane, harimo kugira ngo abantu bafate umwanya wo gutekereza ibihe byashize bagakuramo amasomo, abantu kugira uruhare rwo kwishimira ibyo bagezeho maze bagafata n’umwanya wo kubibungabunga.

Yagize ati “Iyi gahunda izaba igamije gushima Imana yadushoboje kugera kuri ibyo byose, aho abanyamahanga babonaga ko bitazashoboka ariko byarakozwe.”

Birindabagabo avuga ko kwimakaza umuco wo gushima Imana, no kuba abantu bariho iki gihe n’ibihe bizaza, bikwiye guha abantu umuco wo guhimbaza no gushima Imana.

Ati “Kuko iyo ufite abana badashima biba ikibazo. Abanyarwanda bagomba kugira umuco wo gushima kuko iyo ushimiye Imana iguha umugisha mwinshi cyane.”

Musenyeri Birindabagabo yakomeje avuga ko  igikorwa cya Rwanda shima Imana ari icy’Abanyarwanda bose. Uyu mwaka bizabera mu mirenge yose mu gihugu, kandi ngo cyateguwe mu buryo kizabamo udushya.

Amakorale 700 azaririmba, ubu ngo bari kwitoza, kandi hazaba hari n’umuhanzi Muusolini Mahalangu.

Barindabagabo yongeraho ko iyi ari inshuro ya mbere  Rwanda Shima Imana igiye kubera mu gihugu hose dore ko mbere yari isanzwe ibera muri Kigali gusa.

Kuri iyi nshuro ntabwo Dr Rick Warren azaba ahari ariko ngo hari icyizere ko abantu benshi bazabyitabira kuko n’abo mu idini ya Islam baratumiwe.

Daddy SADIKI RUBANGURA
UM– USEKE.RW