Urukiko rwa La Haye rwarekuye Callixte Mbarushimana wa FDLR
Abacamanza b’Urukiko Mpuzamahanga Mpanabyaha rw’i La Haye mu Ubuholandi, rwavuze ko nta bimenyetso bifatika ku byaha biregwa Mbarushimana wari umwe mu bayobozi b’umutwe wa FDLR ukorera mu mashyamba ya DRCongo.
Aba bacamanza bakaba bategetse ko Callixte Mbarushimana ufungiye i La Haye kuva muri Mutarama uyu mwaka, ahita arekurwa.
Ubushinjacyaha ngo bushobora kujuririra iki cyemezo ariko bukazana ibimenyetso bishya ku byaha bwaregaga Mbarushimana, nkuko tubikesha BBC.
Callixte Mbarushimana, yashinjwaga gutanga amabwiriza ku barwanyi ba FDLR, yo gufata ku ngufu abagore n’ubwicanyi byakozwe mu 2009 mu burasirazuba bwa Congo Kinshasa.
Mbarushimana yatawe muri yombi mu kwezi kwa cumi 2010 i Paris mu Ubufaransa, aho yabaga nk’impunzi ya politiki, bivugwa ko yari Umunyamabanga Mukuru w’umutwe wa FDLR.
Mbarushimana,48, mu 2001 yagizwe umwere ku byaha byo kwica abakozi ba Loni (UN) yari ashinzwe kugemurira ibifungurwa, mu gihe cya Genocide mu Rwanda.
Mbarushimana, nubwo yashinjwaga kugira uruhare rufatika mu rupfu rwa Florence Ngirumpatse (wari ushinzwe abakozi mu biro bya Loni i Kigali), yagizwe umwere n’inkiko, ndetse asaba indishyi z’akababaro mu 2004.
Biteganyijwe ko uyu mugabo ahita asubira mu Ubufaransa aho yari yeremerewe ubuhungiro.
Jean Paul Gashumba
UM– USEKE.COM
English
5 Comments
abahezanguni bitawe muri iyi minsi bararekurwa abandi bakagirwa abere nk’aho abatutsi bapfuye biyishe!kurega uwo uregera ni uku nta mufa w’igikeri
ubu abagore babaye ibicibwa mu bandi banyagihugu ba congo kubera kwandagazwa n’inkoramaraso z’uyu mugabo babaye abande?ubu amarira yabo koko ntacyo abwiye bariya bigize ba miseke igoroye bahora bigisha uburengangazira bwa muntu ariko bakaba aribo babukandagira kurusha abandi!! nta mufa w’igikeri koko k’umugani wa mbanda
Abakuru ba FDLR bagomba guhanwa ariko bagahanirwa icyarimwe n’abandi bayobozi b’imitwe yose irwanirayo ndetse tutanibagiwe abayishinze bose kandi bakomeza kuyiha intwaro.Ikibazo kigomba gufatirwa hamwe nibwo abakorewe ibyaha bazabona ubutabera bwuzuye.Murakoze
ese ubundi ababacira imanza ko aribo baboshya ubundi izi kinamico ni iziki?ubu koko ibihumbi by’abagore n’abakobwa bafashwe ku ngufu ntawe ugomba kubibazwa?!!
erega natwe twarapfushije iyo murenganya mu rwanda mwumva ko ntawatsinda habaho gutsinda no gutsindwa
Comments are closed.