Portugal, itarahabwaga amahirwe, niyo yegukanye EURO2016

Mu mateka ya Portugal nibwo bwa mbere yegukanye irushanwa rikomeye. Ibikoze muri iri joro itsinda France kuri Stade France mu mukino wa nyuma wa Euro2016 ku gitego kimwe cyatsinzwe na Éderzito António Macedo Lopes umusore wavukiye muri Guinea Bissau.

Portugal ntiyigeze ihabwa amahirwe kuva irushanwa ritangiye. Yazamutse mu itsinda yarimo nk’ikipe ya gatatu yitwaye neza.

Mu mikino yo kuvananamo (knock out stage) yarayinganyaga igakomeza bigoranye cyangwa hitabajwe kuri penaliti.

Ku mukino wa nyuma uyu munsi byari uko n’ubundi, France yahabwaga amahirwe kuko yazamutse ihigitse ibihangange, cyane cyane Ubudage bufite igikombe cy’Isi.

Umukino ugitangira Christiano Ronaldo wari uyihetse yavunwe na Dimitri Payet, buri wese yahise yibwira ko bikomeye cyane ko Portugal yahivana.

Portugal yihagazeho biratungurana, ba myugariro bahagarara neza cyane kenshi, gusa na France ibura amahirwe anyuranye ya Antoine Griezmann na André Pierre Gignac wari wasimbuye Giroud.

Portugal idafite Ronaldo yakomeje kwihagararaho kugeza iminota 90 irangiye.

Gusa hagati aho hari hinjiyemo umusore Eder, utazwi cyane ku ruhando mpuzamahanga kuko akina muri Lille mu Bufaransa.

Éderzito António Macedo Lopes bita Eder ubu niwe ntwari y’irushanwa, yahawe umupira na Ricardo Quaresma arekura ishoti ari hanze y’urubuga rw’amahina, Hugo Lloris ntiyabasha kuwufata, kiba kiranyoye.

Mu minota 10 yari isigaye France ntacyo yakoze gikomeye, Chriatiano Ronaldo we yari ariho arusha umutoza gutanga amabwiriza.

Umusifuzi Marc Catternburg yaje gusoza umukino maze Ronaldo asubizamo umwambaro w’abakinnye aterura igikombe nka Kapiteni, igikombe yabuze ku mukino wa nyuma nk’uyu mu 2004 ubwo yari afite imyaka 18 batsinzwe n’Ubugiriki.

Portugal ubu niyo mwami wa ruhago i Burayi, Ronaldo nawe nyuma yo kwegukana UEFA Champions League na Real Madrid akaba anegukanye Euro 2016 nta kabuza ko ariwe uhabwa amahirwe yo kuzegukana Ballon d’or ya FIFA ya 2016, akaba yagira enye agasatira Messi ufite eshanu.

UM– USEKE.RW