Sena y’u Rwanda yatumiye za Federations z’imikino zose zanga kwitaba!!!

Seneteri Galican Niyongana Perezida wa Komisiyo y’Imibereho myiza y’abaturage, uburenganzira bwa muntu n’ibibazo by’abaturage muri Sena y’u Rwanda muri iki gitondo yatangaje bidasanzwe ko batumira abayobozi ntibabitabe. Uyu munsi bari batumiye Federation z’imikino mu Rwanda bategereza abayobozi bazo barabura inama irasubikwa.

Bibaye muri iki gitondo aho iyi Komisiyo y’Abasenateri yari guhura n’abahagarariye za fédérations z’imikino inyuranye mu gihugu bagamije kumenya no kugenzura ibikorwa bya guverinoma mu birebana no guteza imbere siporo mu Rwanda.

Mu Nteko na Sena ni hamwe mu hantu mu gihugu bubahiriza amasaha, iyi gahunda yari iteganyijwe saa tatu za mugitondo. Aya masaha yageze nta n’umwe wo muri Federation zirenga 10 batumiye urahagera.

Mu Rwanda hari Federation z’imikino zigera kuri 30, izifite ubuzima gatozi ari nazo zishobora kuba zari zatumiwe ni 18.

Senateri Galican Niyongana avuga ko batazi impamvu izi federations zititabye ubutumire bwa Sena, kandi bazi neza ko bwabagezeho mu byumweru bibiri bishize.

Avuga ko ndetse na Minisiteri yagiyeyibutsa abatumiwe.

Ati “Ubu inama turayisubitse, turi buvugana nabo tumenye impamvu batitabiriye, yenda baba bafite impamvu ifatika tuzavugana nabo tumenye impamvu.”

Ubusanzwe amategeko arasobanutse iyo Inteko Ishinga amategeko yagutumiye ukagira impamvu ituma utaza ubimenyesha mbere ariko bo ngo ntabyo bamenyesheje.

Saa tatu zuzuye Abasenateri na bamwe mu banyamakuru bari bageze mu cyumba Sena yakiriramo abo yatumiye. Nta muyobozi wa Federations n’imwe wari wahageze.

Abasenateri ubusanzwe bavuga ko bategereza umutumirwa wakererewe mu gihe cy’iminota 15 nyuma yayo iyo atarahagera bagasubika iyo gahunda bagakora ibindi. Niko byagenze.

Umuyobozi wa Federation y’umukino wa Chess (Jeu d’échecs) yinjiye aha ku Nteko Ishinga Amategeko saa tatu n’imonota 23 naho uwa Tennis yo kumeza ahagera saa tatu na 35. Basanze abasenateri bagize iriya komisiyo basohotse.

FERWACY ngo yabonye ubutumire ejo

Inteko ubutumire bwayo ngo yabugejeje kuri MINISPOC mu byumweru bibiri bishize.

Eugene Semigabo uyobora Federation ya Tennis de Table avuga ko ubutumire yabobonye mu byumweru bibiri bishize.

Ati “Ministeri ya sports yadutumiye ibinyujije mu nyandiko, njye sinakererwe, nahageze ku gihe, ariko ntinda ku irembo mu gikorwa cyo gusaka. Abandi bo sinzi impamvu bataje, ariko nkeka ko batabihaye uburemere kuko nta no kwibutsa kwabayeho.”

Tumubajije niba kuba ama federation atari inzego za leta, ataribyo bishobora kuba batitaba sena, yasubije ati:

“Ama federation  yose abarizwa muri ministeri ya sport kandi yo ni urwego rwa leta runagenzurwa nayo. Tuba tugomba gukurikiza no kubahiriza inshino z’iyi ministeri, kwitaba ibikorwa bya leta ni inshingano zacu rwose. Ndumva atari impamvu yatuma bagenzi banjye batitaba.”

Kevin Ganza wo muri Jeux d’echec we yavuze ko yakererejwe n’umubyigano w’imodoka mu muhanda.

Aimable Bayingana umuyobozi wa Federation yo gusiganwa ku magare yabwiye Umuseke ko FERWACY ubutumire kuri E Mail yabubonye ejo kuwa kane, kandi we akaba yari yamaze gufata izindi gahunda uyu munsi.

Umuyobozi wa Federation y’umupira w’amaguru mu Rwanda, FERWAFA, we uyu munsi biteganyijwe ko asomerwa n’Urukiko rw’ibanze rwa Nyarugunga ku bufatanyacyaha ashinjwa mu gufata icyemezo gishingiye ku itonesha, icyenewabo n’ubucuti mu gutanga isoko ryo kubaka Hotel ya FERWAFA.

Photos © R.Ngabo/Umuseke

Roben NGABO
UM– USEKE.RW