Sunrise FC igiye kuva mu maboko y’Intara ihabwe Akarere

Umwaka utaha w’imikino uzatangira ikipe ya Sun rise FC itakiri mu maboko y’intara y’Uburasirazuba, kandi itakibarizwa mu mugi wa Rwamagana ihabwe Akarere kamwe mu tugize iyi ntara.

Ikipe ya Sunrise FC yashinzwe n’intara y’Uburasirazuba muri 2011 ikajya ikusanyirizwa ubushobozi bwo kuyibeshaho na buri karere k’iyi Ntara, gsua ubu ngo igomba gushakirwa akarere kamwe muri iyo ntara kayifata mu nshingano.

Odette Uwamariya Guverineri w’Intara y’Uburasirazuba yabwiye Umuseke ko uturere twagiye duseta ibirenge mu gutanga inkunga ya miliyoni 10 ku mwaka yo gutunga Sunrise basabwaga.

“Icyo twifuza ni uko Sunrise yaba ikipe ibaho neza, ibona ingengo y’imari ihagije yayitunga ikaba ikipe yahesha ishema intara yacu. Yari isanzwe itungwa na miliyoni 10 ava muri buri karere kagize intara yacu. Ariko kuko uturere twacu natwo tugiye dufite amakipe y’umupira w’amaguru byasaga nko kugorana kubona ku gihe amafaranga yo gutunga Sunrise.

Twafashe umwanzuro ko, umwaka utaha (w’imikino) Sunrise izavanwa mu maboko y’Intara, igahabwa kamwe mu turere tugize Intara y’uburasirazuba, kakayitaho, ku buryo yaba ikipe ihanganira ibikombe nk’izindi, kandi ntibibangamire utundi turere nkuko bimeze ubu.” – Odette Uwamariya

Sunrise ngo ntizongera kubarizwa mu mugi wa Rwamagana kuko hasanzwe ikipe y’Akarere ka Rwamagana kandi nayo iri mu kiciro cya mbere (Rwamagana City)

Tumubajije Akarere kazafata ikipe ya Sunrise FC, yasubije Umuseke ko bazabitangaza byose nyuma y’inama bafitanye n’ubuyobozi bwa Sunrise. Gusa ngo bashobora kuyivanga n’indi kipe imwe isanzwe mu turere tugize Intara y’uburasirazuba.

Amakipe y’uturere mu ntara y’Uburasirazuba ni: Bugesera FC, Rwamagana FC, Kirehe FC, Nyagatare FC, Etoile de l’est (Ngoma), uturere tudafite amakipe y’umupira w’amaguru ni Kayonza na Gatsibo.

Roben NGABO
UM– USEKE.RW