Karongi: Abamenye insina za Fiya bazivuga ibigwi, hari abagikomeye kuri Kayinja

Mu imurikabikorwa ryabaye mu murenge wa Mutuntu kuri uyu wa kabiri tariki 7 Kamena 2016,  abaturage  bavuga ko nyuma yo kugirwa inama n’ubuyobozi  bahinduye imyumvire, bahinga bya kijyambere urutoki rwa Fiya, bakoresha inyongeramusaruro zitandukanye n’ishwagara barushaho kubona umusaruro ufatika, ariko hari ngo n’abandi baturage bagitsimbaraye ku rutoki rwa kera bita Kayinja.

Abaturage bitabiriye imurikabikorwa baturutse mu tugari dutandukanye tw’uyu murenge w’icyaro bavuga ko kutita ku buhinzi n’ubworozi ariyo fumbire y’ubukene.

Bavuga ko mbere bahingaga ntibite neza kubyo bakora maze umusaruro ukaba mucye bagahora bavuga ko ubutaka bwabo butera, nyuma yo gukanguka ubu ngo barishimira umusaruro babona.

Sembagare Claver  wo mu kagari ka Ngundusi avuga ko mbere yezaga 50Kg z’ibishyimbo ku buso bunini, ariko  ubu  kuri ubwo buso ngo yezaho 300Kg.

Ati “Kutita ku buhinzi n’ubworozi niyo fumbire ya mbere y’ubukene.  Ubu iwange noroye intama, ibikomoka ku buhinzi nawe amaso araguha.”

Emmanuel Ruzigana Umunyamabaga nshingwabikorwa w’umurenge wa  Mutuntu, avuga ko nubwo biba bitoroshye  kubera imiterere y’uyu murenge  ngo bagerageza kwegera abaturage bakabagira inama  yo guhinga neza kandi  ntibavange imyaka.

Ngo basaba kandi abaturage kudakomeza kwizirika ku nsina gakondo usanga zimeze nk’amateke zikera agatoki gato, ahubwo bagahinga  insina za kijyambere “FIYA”.

Ati “Hari abaturage bagifite imyumvire ko ngo umutobe wa ‘Fiya’ ubiha ariko ni imyumvire igomba guhinduka kuko igitoki kimwe cya Fiya  gishobora kugura ibihumbi umunani (Frw 8000) mu gihe icyera ku nsina gakondo hari n’igihe kitagura n’amafaranga magana tanu (Frw 500).”

Ibyo ngo ni byo bagerageje kuganiriza abaturage kandi barabyumva, ati “Urabona ko umusaruro wabyo ugaragara muri  iri murika bikorwa.”

Photos/S.Ngoboka/Umuseke

Sylvain NGOBOKA
UM– USEKE.RW/KARONGI