Mukura itsinze Musanze ihita inganya amanota na Rayon

Kuri uyu wa mbere hakinwe imikino yo ku munsi wa 26 wa shampiyona itarabereye igihe. Police FC itsinze Amagaju FC 3-1, naho Mukura VS itsinda Musanze 3-2, ihita ifata Rayon Sports mu manota.

Kuri uyu mukino waberaga kuri stade Huye, igice cya mbere cyihariwe na Mukura VS, bituma Ndayishimiye Christophe afungura amazamu ku munota wa 34, ku mupira yari ahawe na Hakizimana Muhadjiri.

Ku munota wa 40, Habimana Yussuf yatsindiye Mukura igitego cya kabiri ku ishoti rikomeye yatereye hanze y’urubuga rw’amahina.

Hakizimana Muhadjiri umaze gutsindira MVS ibitego byinshi muri shampiyona, yongeye gushimisha abaturage ba Huye, atsinda igitego cya gatatu kuri coup-franc.

Musanze ntiyatahiye aho kuko ibitego byayo bibiri yabibonye mu gice cya kbiri bitsinzwe na Maombi Jean Pierre na Uwihoreye Imsael.

Aya manota atatu Mukura ibonye, atumye inganya na Rayon sports amanota 53, gusa Rayon sports yo ifite imikino ibiri y’ibirarane.

Ku kicukiro, umutoza Cassa Mbungo Andre na Police FC ye, nabo uyu munsi babonye amanota atatu nyuma  yo gutsindwa na Espoir mu cyumweru gishize.

Ni umukino Police FC yatsinze Amagaju 3-1. Ibitego bya Police FC byatsinzwe na Danny Usengimana, Habyarimana Innocent na Imran Nshimiyimana. Igitego cy’Amagaju, cyatsinzwe na Ndizeye Innocent

Ibitego bya Muhadjiri Hakizimana, na Usengimana Danny byatumye banganya ibitego 13 na Ismaila Diarra, bakomeza kuyobora ba rutahizamu batsinze byinshi muri shampiyona 2015-2016.

Uko imikino yagenze ku munsi wa 26 wa shampiyona

Kuwa Gatandatu

Espoir FC 1-0 APR FC
Gicumbi Fc 2-1 Sunrise FC

Kuwa Mbere

AS Kigali 4-0 Bugesera FC
Mukura VS 3-2 Musanze Fc
Kiyovu SC 0-1 Rwamagana City FC
Police FC 3-1 Amagaju Fc

Imikino yasubitswe kubera umukino w’Amavubi U20

AS Muhanga vs Rayon Sports
Etincelles vs Marines

Roben NGABO
UM– USEKE.RW