Sugira Ernest yagiye i Kinshasa kumvikana na AS Vita Club

Rutahizamu w’Amavubi na AS Kigali Ernest Sugira mu ijoro ryakeye aherekejwe na Team Manager wa AS Kigali, berekeje i Kinshasa aho bagiye mu biganiro byanyuma n’ikipe ya AS Vita Club yaho.

Biherutse gutangazwa ko uyu musore yaguzwe amadorari 130 000$ ngo ajye muri iyi kipe, ariko kugeza ubu aya makuru ntiyemejwe n’uruhande urw’arirwo rwose.

Uyu mukinnyi yatangaje ko agiye kumvikana n’iyi kipe bakaba basinya amasezerano, kiriya giciro cyavuzwe nacyo ngo gishobora kuzamuka cyangwa kikamanuka.

Sugira avuga ko yagishije inama abakinnyi bagenzi be bakinnye muri iyi kipe nka Daddy Birori (uyikinamo n’ubu) na Nizigiyimana Karim ubu ukina muri Gor Mahia muri Kenya nawe waciye muri AS Vita Club i Kinshasa.

Sugira umaze gutsindira Amavubi ibitego icyenda kuva yatangira kuyakinira mu 2013, umutoza wa Vita Club Florent Ibenge aherutse kuza kumurambagiza ndetse ariko na mbere yari yatangaje ko ari mu bakinnyi yashimye mu gikombe cya CHAN, aho yanatsinze igitego ikipe ye ya Congo Kinshasa yatozaga.

Sugira mu 2014 ikipe ya APR FC yari imaze umwaka umwe imuhaye amasezerano y’imyaka ibiri yaramwirukanye kubera umusaruro mucye, ajya muri AS Kigali ari naho yongeye guca ibintu kugeza ubu ubwo ari umukinnyi wifuzwa ku rwego mpuzamahanga.

UM– USEKE.RW