Kubera impanuka, Byukusenge Patrick ntazitabira ‘Vuelta a Colombia’

Nyuma yo kwegukana ‘Race to remember’, Patrick Byukusenge yakoze impanuka, izatuma adakina irushanwa mpuzamahanga ‘Vuelta a Colombia’ nk’uko byemezwa n’abo mu ishyirahamwe ry’umukino wo gusiganwa ku magare.

Kuri uyu wa gatandatu hakinwe  isiganwa rigamije kwibuka abazize Jenoside 1994 muri Rwanda Cycling Cup ryiswe ‘Race to Remember, ryavaga i Nemba ku mupaka w’u Burundi, riza i Kigali riciye mu Bugesera. Ryegukanywe na Byukusenge w’ikipe ya Benediction Club akoresheje 3h16’50’.

Yakurikiwe na Uwizeye Jean Claude wa Les Amis Sportifs wakoresheje 3h16’50’.

Nyuma y’iri siganwa, aba basore bombi bataha ku igare bakoze impanuka bava i Kigali bajya i Musanze, mu mwiherero wa Team Rwanda.

Jean Claude Uwizeye wari imbere yatobokesha ipine y’igare, bituma bombi bagwa. Byukusenge niwe wavunitse cyane ku rutugu, biteganyijwe ko agomba kubagwa kuri uyu wa mbere.

Naho Uwizeye we yakomeretse bidakomeye.

Kubera iyi mvune y’urutugu, kapiteni mushya Team Rwanda ikinira mu muhanda (Road Races), Patrick Byukusenge wasimbuye Hadi Janvier, ntabwo azitabira isiganwa rizenguruka igihugu cya Colombia  ‘Vuelta a Colombia’, rizaba hagati ya tariki 13-26 Kamena 2016.

Roben NGABO
UM– USEKE.RW