Kuki Sugira Ernest ari kwanga kujya muri Vita Club?

Mu mpera z’icyumweru gishize Florent Ibenge utoza Vita Club yaje kurangiza ‘transfer’ ya Sugira Ernest, ariko uyu musore ntiyemeye kujya muri Vita Club i Kinshasa. Hakomeje kwibazwa impamvu ibiri inyuma, kugeza ubu usibye gukekeranya nta iratangazwa, nyir’ubwite nawe ntashaka kuyivuga.

Kuwa gatanu tariki 6 Gicurasi 2016, nibwo umutoza wa Vita Club n’ikipe y’igihugu ya DR Congo, Jean Florent Ikwange Ibengé yageze mu Rwanda, aje kuganira na rutahizamu wa AS Kigali Sugira Ernest.

Ikinyamakuru Le Potentiel cyo muri DR Congo cyandise ko mbere y’uko Florent Ibenge aza mu Rwanda, ibiganiro byari byararangiye, hari hasigaye gushyira umukono ku masezerano.

Bavugaga ko ibihumbi 80$ (asaga miliyoni 60 frw) Vita Club yari yemeye kuyatanga kuri Sugira w’imyaka 25, akabasinyira amasezerano y’imyaka itatu.

Kuwa gatandatu tariki 7 Gicurasi 2016, Florent Ibenge yatangarije abanyamakuru yeruye ko yaje mu Rwanda gushaka abakinnyi.

Urubuga rwa internet rwa Vita Club rwemeza ko Sugira Ernest ariwe rutahizamu  babona wabafasha gutwara CAF Champions League y’uyu mwaka

Gusa amakuru agera ku Umuseke, aremeza ko ibyifuzo by’iyi kipe yo muri DR Congo, bitagezwe ho, kuko ngo Sugira Ernest yanze kubasinyira.

Kuwa kabiri tariki 10 Gicurasi 2016, amakuru agera k’Umuseke aremeza ko nyuma y’imyitozo ya AS Kigali, abatoza bayo n’abakinnyi bagenzi ba Sugira Ernest (barimo Kagere Meddy urimo gukora imyitozo muri AS Kigali), bafashe iminota yo kugira inama uyu rutahizamu, ngo bamusabaga gusinyira Vita Club, kuko amahirwe aza rimwe mu buzima.

Ibi byabaye nyuma y’uko umutoza wabo, Eric Nshimiyimana atangaje ku mugaragaro ko yifuza ko Sugira ajya gukina muri DR Congo.

Aganira n’abanyamakuru Nshimiyimana yagize ati: “Namugiriye inama yo gusinya vuba. Urebye umupira w’amaguru uko bimeze ubonye abagushaka ntutinda kuko ushobora kuvunika umunsi ukurikiyeho.

Ubuyobozi bw’ikipe bwansabye ko nakwemeza Sugira ko yarangizanya na Ibenge, ariko nyine nta kundi kuko ni amahitamo y’umukinnyi ku giti cye.”

Umuseke wagerageje kuganira Sugira Ernest ariko yanga kugira icyo avuga ku mpamvu ituma yanga kujya gukina muri DR Congo. Kugeza ubu ibivugwa ni ibikekwa ko uyu musore yaba atinya ibibazo by’umutekano mucye n’amarozi.

Bikanakekwa ko kandi, uyu musore afite andi makipe akomeye amwifuza nka; Primeiro de Agosto yo muri Angola, na Orlando Pirates yo muri Afurika y’epfo.

Sugira Ernest yemeye kujya muri Vita Club, yajya afatanya na Etekiama Agiti Tady (Birori Daddy), uzarangiza ibihano yafatiwe na CAF muri Kanama uyu mwaka.

Roben NGABO
UM– USEKE.RW