Moïse Katumbi yatangaje ko ashaka kuba Perezida, urugo rwe rwagoswe n’ingabo

Umuherwe Moïse Katumbi Capwe abicishije kuri Twitter yatangaje ko aziyamamariza kuyobora Leta ya Congo Kinshasa, yabikoze mu gihe kuwa gatatu Minisitiri w’ubutabera wa Congo yari yasabye ko habaho iperereza ku bacanshuro b’abarwanyi ngo baba barinjijwe muri Congo na Katumbi. Kuri uyu wa kane urugo rwe rwagoswe n’abasirikare.

Mu butumwa yatanze, Moïse  Katumbi yavuze ko ihuriro ry’amashyaka atavuga rumwe na Leta  ryamugiriye ikizere cyo kuba umukandida waryo mu matora y’umukuru w’igihugu ateganyijwe mu kwezi kwa 11/2016. Ati “Nemeye nciye bugufi izi nshinano zikomeye”

Muri ubu butumwa, uyu mugabo wahoze ari Guverineri w’Intara ya Katanga yatangaje ko kuva yegura kuri uriya mwanya muri Nzeri 2015 yahise yinjira muri Politiki igamije impinduka muri Congo ndetse ubu ngo ari kwitegura kuzenguruka igihugu cyose cya Congo, kingana n’Uburayi bw’Uburasirazuba, akwirakwiza ubutumwa bwe.

Kuri uyu wa kane mu gitondo abasirikare ngo bahise baza bagota ahatuye Moïse  Katumbi mu mujyi wa Lubumbashi, bafunga inzira iganayo babuza gusohoka cyangwa kuhinjira, amakuru atangazwa n’ikinyamakuru Politico cyo muri Congo aravuga ko ingabo za MONUSCO zahise zihagera guhosha imirwano ishobora kwaduka.

Hari amakuru avuga ko Leta yaba yashyizeho impapuro zo guta muri yombi Moise Katumbi ubu ngo uri mu rugo rwe n’abantu bakorana nawe aho babujijwe gusohoka.

Yatangaje ko ikizere yagiriwe n’ihuriro ry’abatavuga rumwe n’ubutegetsi kimuha amahirwe menshi yo kuzagera kuri uriya mwanya bamwohereje guhatanira.

Kuwa gatatu   Alexis Thambwe Mwamba Minisitiri w’ubutabera wa Congo Kinshasa yasabye umushinjacyaha mukuru gutangira anketi ku kuzana mu gihugu abarwanyi b’abacanshuro bivugwa ko batumijwe na Katumbi.

Minisitiri Tambwe avuga ko kuva Katumbi yava ku buyobozi bw’Intara ya Katanga ngo inzego za Leta zabonye ko mu ikipe y’abamurinda yazanyemo abarwanyi b’abanyamahanga.

kuri Twitter Katumbi yaranditse ati “Ubucabiranya bwo hasi bwa Leta ntabwo bumbuza gukomeza intambara yanjye y’amahoro.”

Katumbi yahoze ari mu nkoramutima za Perezida Kabila n’ishyaka rya PPRD.

UM– USEKE.RW