Rochester: Abanyarwanda bahuriye hamwe bibuka abazize jenoside yakorewe abatutsi

Abanyarwanda n’inshuti z’u Rwanda mu mujyi wa Rochester bahuriye hamwe mu gikorwa cyo kwibuka Jenoside yakorewe abatutsi ku nshuro ya 22 baboneraho n’umwanya wo kugaragaza isura y’u Rwanda n’icyerekezo gishya cy’ababyiruka.

Abanyarwanda baba mu mujyi wa Rochester biganjemo abanyeshuri biga muri kaminuza ebyiri ziherereye muri uyu mujyi arizo University of Rochester ndetse na Rochester Institute of Technology, abatuye Buffalo,  abarimu ndetse n’inshuti z’u Rwanda bahuriye kuri uyu wa 14 Mata 2016, mu gikorwa cyo Kwibuka ku nshuro yo 22 abazize Jenoside yakorewe abatutsi mu Rwanda muri 1994.

Abafashe ijambo bose bagarutse ku bubi bwa jenoside, uko itegurwa, uko ishyirwa mu bikorwa n’ingaruka zayo. Mu ijambo rye Shami Elodie waje ahagarariye Ambassade y’u Rwanda muri USA, yashimiye abateguye uyu munsi ndetse agaragaza ko bitanga icyizere cy’ejo heza. Yakomeje ati: “Twe abanyarwanda tuzi amateka yacu mabi yatugejeje kuri Jenoside, tubana kandi n’ingaruka zayo buri munsi, ariko ikiruseho nuko twasobanukiwe neza ko twifitemo ubushobozi bwo kubaka u Rwanda rwiza rushyize hamwe rufite agaciro kandi rwiyubashye” – Shami Elodie.

Mu butumwa bwe kandi yavuzeko urugamba rwo guhagarika jenoside mu Rwanda rwarangiye ariko abayikoze bakomeje umugambi wabo bahagurukira kuyipfobya. Yahamagariye abitabiriye uyu muhango ku rwanya ingengabitekerezo ya Jenoside bavuga ukuri ku mateka y’u Rwanda. Asoza ijambo rye Shami  yasabye abanyarwanda baba Rochester ko bakomeza kurangwa no kwigisha amateka y’u Rwanda bakarusha ijwi abashaka kuyagoreka bagamije gutanya abanyarwanda no guhakana jenoside.

Manzi Ian, watanze ubutumwa mu izina ry’abanyarwanda baba mu mujyi wa Rochester, yashimiye abafashe umugambi wo guhagarika jenoside ndetse bamwe bakanahasiga ubuzima. Yakomeje agira ati: “Bamwe muri twe twavutse nyuma ya Jenoside, tugira amahirwe abandi banyarwanda batigeze bagira yo kugira igihugu, twe turi abo guhamya ko u Rwanda rwazutse, ntituzatesha agaciro ibyo mwaharaniye ahubwo tuzakomeza ku byubakiraho igihugu cyacu gikomeze kwiyubaka”.

Abarimu bigisha kuri University of Rochester bitabiriye uyu muhango, bavuze ko ibindi bihugu bikwiye gufata isomo ku Rwanda mu nzego zitandukanye harimo kwiyubaka, kubabarira ndetse n’imiyoborere myiza. Banashimangiye ko ubucuti bafitanye n’u Rwanda bukomeza kwiyongera binyuze mu banyeshuri b’abanyarwanda biga muri iri shuri.

Tubibutse ko Rochester ari umujyi uherereye mu majyaruguru ya New York muri USA, iyi ikaba ari inshuro yo gatatu abanyarwanda bahaba bategura ibikorwa byo kunamira abazize jonoside yakorewe abatutsi mu Rwanda.

Photo: George M.
UM– USEKE