Kamonyi: Abantu bane mu maboko ya Police kubera ingengabitekerezo ya Jenoside

Gacurabwenge – Mu biganiro byo kwibuka ku  ncuro ya 22 jenoside yakorewe abatutsi mu Rwanda, Aimble Udahemuka umuyobozi w’Akarere ka Kamonyi  atangaza ko muri aka karere hari abantu bane ubu bafunze  bakekwaho ingengabitekerezo ya jenoside, agasaba abaturage kwirinda  iki  cyaha kuko  hari itegeko  rigihana ryashyizweho.

Uyu muyobozi w’Akarere ka Kamponyi yabwiye abari mu biganiro kuri uyu wa kabiri ko ingengabitekerezo ya Jenoside irangwa no guhakana Jenoside yakorewe Abatutsi bavuga ko ibyabaye ari intambara y’amoko ndetse no kuvuga amagambo y’amacakubiri no gupfobya Jenoside.

Asaba abaturage kwirinda imvugo z’abakoze Jenoside ziyihakana cyangwa amagambo asesereza abarokotse Jenoside kuko ngo n’ababigerageje ubu hari itegeko ribahana.

Udahemuka yagize ati “ Ubu hamaze  kuboneka abantu bagera kuri bane muri aka karere kacu bakurikiranyweho ingengabitekerezo, twumva ko uyu mubare ari munini ugereranyije n’inyigisho z’ubumwe n’ubwiyunge  zitangwa n’ubuyobozi bw’igihugu.”

Daniel Renzaho umwe mu barokotse Jenoside wari muri ibi biganiro avuga ko  bitangaje kuba hari igihe  babasaba gutanga ubuhamya bw’ibyo babonye muri jenoside  kandi  barihishahishaga kuko bahigwaga, akavuga ko  hari abo banganya imyaka y’amavuko batahigwaga bazi ibyabaye kandi batagize n’uruhare muri jenoside ariko banga kuvugisha ukuri ku byo bazi, ari nabo  akeka ko batangiye kugaragaraho iyo ngengabitekerezo ya jenoside  muri iki gihe cyo kwibuka.

Kuri iki kibazo umuyobozi w’Akarere avuga ko inyigisho  baha abaturage ari rusange  kandi ko bashishikariza buri wese kuvuga ibyo yabonye muri Jenoside ariko ko hakiri bamwe mu baturage bafite umuco mubi wo guceceka ntibashake kugaragaza ukuri ku byo bazi, ari nabo  bifuza ko bahindura imyumvire ahubwo bagafatanya n’abandi  kubaka igihugu kitagira amacakubiri.

Abaturage bane bagaragaweho  ikibazo cy’ingengabitekerezo bakomoka mu murenge wa  Nyarubaka, Rukoma, Runda, na Ngamba ubuyobozi bw’Akarere buvuga ko hari ababyemera abandi bagahakana ko ntabyo bavuze.

Elisee MUHIZI
UM– USEKE.RW