Bitamworoheye Mukarusine yarokoye abana 3 bahigwaga muri Jenoside

*Ku bwo kuzirikana igihango cy’ubushuti yarokoye abana batatu b’abakobwa

*Yatewe ibitero birenga umunani saa munani z’ijoro, bamusenyera bashaka abo yahishe

*Babiri muri bo amaze kubashyingira undi aritegura kujya kwiga muri kaminuza 2016/17

*Yabahishe mu cyumba ibitero bitabashaga kugeramo kubera Imana.

Kuba mu gihe cya Jenoside yakorewe Abatutsi muri Mata 1994 mu Rwanda, abari inshuti za hafi z’imiryango yahigwaga muri kiriya gihe , aribo ahanini bagize uruhare mu kwica Abatutsi b’inzirakarengane birengagije ko basangiye byinshi ndetse bakagabirana, aho wasangaga n’abashakanye umwe yihinduka mugenzi we akamwica, hari bamwe na bamwe banze gutatira igihango cy’ubushuti bagiranye n’imiryango yahigwaga bahisha abana babo nk’ibyabaye kuri Mukarusine wahishe abana batatu akabanambaho.

Annonciatha Mukarusine wari ufite imyaka 42 mu gihe cya Jenoside yakorewe Abatutsi mu 1994, yari umwarimu kuva mu 1969 kugeza mu ntangiriro z’uyu mwaka wa 2016.

Ntiyahigwaga mu gihe cya Jenoside, ni umwe mu banze gutatira igihango maze abasha kurokora abana bo mu miryango bari babanye abahishe iwe. Muri batatu yahishe harimo babiri yabyaye muri batisimu kandi akaba yarabitewe n’uburyo yabanaga n’imiryango yabo, begeranye, ndetse basangira byose.

Mukarusine wo mu Murenge wa Mukura, mu karere ka Huye avuga ko yarokoye abana batatu b’abakobwa akaba yarabitewe n’uko ko akimara kubona Jenoside ije yavuze ko iyo miryango itasibangana mu rugo rwe, kandi we atarahigagwa.

Ibyo ngo byatumye ageregeza kurokora abo bana kugira ngo abasigarane kandi ngo Imana yabimufashijemo.

Yagize ati “Nubwo byampenze, ariko kuko navugaga ko abantu batagomba gushira bose niyemeje kugira abo ndyama hejuru kandi byarakunze.”

Umutima wo kurokora aba bana ngo yawugize kubere ko yabonye ababyeyi babo bari babishe, nta wundi basigaranye, uretse we. Byatumye yiyemeza kubarokora ku buryo byageze n’aho abahungana, abagarura mu rugo Jenoside irangiye maze abatangiza ishuri barakomeza bariga bararangiza.

Aho yakuye ubutwari n’imbaraga zo kugira abo arokora, umutima utaragizwe na benshi, …

Avuga ko muri kiriya gihe warebaga ukuntu abandi bari gupfa kandi wowe udahigwa kugira ngo ujye aho uhishe abantu  byari ibintu bikomeye cyane, ariko ko yabikoze kubera Imana yamufashije kugira ngo n’ubu babe bakiri kumwe.

Uyu mubyeyi avuga ko nyuma ya Jenoside amashyari n’urwango byabaye byinshi mu muryango we bavuga ko ashobora kubashinja, ariko ko atabikoze kuko ibitero byazaga mu ijoro bityo ntabashe kugira uwo amenya.

Ati “Ntabwo nashoboye kugira umuntu mvuga, kuko nta we nabonaga bazaga nijoro bisize ibintu utabona isura.”

Inzira koresheje ngo abashe kurokora abantu babatu muri Jenoside…

Uko yabarokoye avuga ko yari afite abana b’abahungu, umukuru w’imyaka 13, maze ibitero byarazaga bakaba babyumvise bagahita bahisha bagenzi babo, ngo ni byo byatumye nta muntu bamwicana iwe.

Avuga ko yari afite inzu nini, ibitero byaza ba bana bakabahisha mu cyumba kimwe, bityo kubera Imana icyo cyumba ngo nta gitero na kimwe kinjiyemo ngo kimenya ko hihishemo umuntu kuko ngo iyo bazaga basakaga aho Mukarusine yabaga aryamye n’aho abana be babaga baryamye.

Umuto mu bana b’abakobwa yahishe ni we babaga baryamanye ngo agahita amushyira munsi y’igitanda agashyiraho ibikapu by’imyenda, akarundamo n’inkweto abicanyi ntibashobore kumubona, icyo gihe ngo aho abandi babaga baryamanye n’abandi bana bahitaga babahisha mu kindi cyumba.

Ati “Iyo bazaga kuntera nabaga nabinetse, abana nkabahisha. Babonaga aho ndyamye nta muntu uhari n’aho abana baryamye nta we uhari ndetse n’aho bageze hose nta we babonye bahitaga bagenda.”

Annonciatha Mukarusine avuga ko yatewe n’ibitero birenga umunani mu masaha ya saa munani z’ijoro, inzu ye barayisakambuye bayikuraho igisenge bashakamo abantu yaba yahishemo, ariko nta n’umwe babonye. Nyuma yabona bikomeye aba ahahunze.

Abana yarokoye babaye abe, babiri barashyingiwe, umwe agiye kwiga Kaminuza…

Abo yarokoye babashije kwiga kaminuza. Uwimana Chantal na Uwamariya Marie Goreth yarabashyingiye, ndetse amaze kugira abuzukuru. Muri aba yarokoye mu rugo asigaranye umwe Akimana Mutesi Alphonsine ukirangiza amashuri yisumbuye.

Mukarusine avuga ko abana be bari abahungu gusa ariko ko anezezwa n’iyo abonye ashyingira abakobwa ari we nyina, ari we se.

Ati “Mu ngo zabo njyayo uko nshaka nk’umubyeyi mu bana babo, mbese ni isheme rikomeye nagize kandi nta mukobwa nari narabyaye.”

Mu karusine mu buhamya bwe ashima ko abarokotse Jenoside bafite umutima wibuka ineza yagiriye abantu batari bameze neza muri Jenoside, bagashimira abagize uruhare mu kubarokora.

Joselyne UWASE
UM– USEKE.RW