Mugabe yifuza ko abagabo basambanya abana bajya babakona

Perezida Robert Mugabe wa Zimbabwe atanga umuti ku bagabo bafata abana ku ngufu yavuze ko ari ukubaca ibitsina. Ni mu gihe muri iki gihugu hamaze iminsi havugwa kwiyongera kw’abagabo bafata abana bato cyane b’abakobwa ku ngufu.

Mugabe yavuze uyu muti w’iki kibazo ubwo yizihizaga isabukuru y’imyaka 92 muri week end ishize nk’uko bitangazwa n’ikinyamakuru Southern Eye cyo muri Zimbabwe.

Mugabe yagize ati “Ubwo bushake ni bwoko ki butuma umuntu ahohotera umwana? Ndikwibaza igihano gikwiriye bene abo bantu. Mwambwira igihano gikwiriye ibyo bikoko bidufatirwa utwana ku ngufu?….urukezo….tuzabigira inkone.

Akomeza agira ati “Ubu nabwo kandi ya miryango iharanira uburenganzira bwa muntu izavuga ko dukabije!!!

Itegeko rya Sharia rivuga ko ukuboko gukoreshejwe mu kwiba baguca. None bakoresha iki mu gusambanya abana? Ndibaza ko icyo bakoresha nacyo dukwiye kugica maze bakagenda bakabashyiriraho igikorano.”

Abaturage bamwumvaga bakomye amashyi menshi ajyanye n’ibitwenge kuri iri jambo ry’uyu mukambwe kuri uyu munsi w’amavuko w’uyu mukambwe umaze imyaka 36 ayobora Zimbabawe.

Igitekerezo cya Mugabe cyashyigikiwe na Phelekezela Mphoko Visi Perezida wa Zimbabwe  na Minisitiri wo guteza imbere abagore Nyasha Chikwinya.

UM– USEKE.RW