Kigali: Restaurant ihenze ibiryo ni 20 000Rwf ihendutse ni 300Rwf
Imijyi yose igira aha macye cyane, aha macye, ahaciriritse, ahahenze n’ahahenze cyane. Usonzeye i Kigali wishakisha hamwe muri aho hose, hose kandi i Kigali urahabona kuko ushobora kubona isahani y’ibiryo ku mafaranga magana atatu gusa, ukaba hari n’aho wayibona ku gihumbi kimwe, aho wayibona kuri bitanu n’aho wayigura ibihumbi makumyabiri cyangwa mirongo itatu. Umuseke wageze muri izi restaurant zose, uritegereza.
Mu mujyi wa Kigali ahagaragara restaurant zihenze cyane ni mu bice bya Nyarutarama, Kiyovu, Kakiru na Kimihurura. Restaurants zihenze cyane ngo zigendana n’ubuzima bw’abazigana nabo baba babayeho mu buzima bw’igiciro. Muri aba higanzamo abanyamahanga.
Freddy Muhirwa umwe mu bakora akazi ko kwakira abantu no kubitaho ukamazemo igihe kinini yabwiye Umuseke ko restaurants zihenda cyane biturutse ku biciro by’amazu, ubumenyi bw’abakozi bayo, n’ubushobozi bw’abazigana.
Imwe muri restaurant y’abaphilipines iherereye i Nyarutarama ntabwo ifunguro ryaho ni umwihariko wo mu burasirazuba bw’isi, ntabwo bagira buffet, ibi babihuriyeho n’izindi nke nazo zihenze cyane z’abashinwa n’abahinde, utumaho ibyo ushaka.
Umuseke wasanze kugira ngo ufate ifunguro ry’umuntu umwe rikwiriye (rihaza umuntu umwe utarwaye) biri hagati y’amafaranga 20 000Rwf na 30 000Rwf isahani imwe.
Ifunguro ry’aha biragoye kumenya ibirigize kuko akenshi atari indyo z’abanyarwanda uretse kumenya nk’umuceri, inkoko, ifiriti se cyangwa inyama y’ifi, inka….cyangwa salade.
Izi usanga zijyamo abanyamahanga bari mu butumwa bw’akazi mu Rwanda, abakozi ba za ambasade, ba Ambasaderi, abakozi b’imiryango ishamikiye kuri UN n’abandi banyarwanda bacye bo mu nzego zo hejuru.
Iya macye yarurira ni 300Rwf
Uhise umanuka ugashakisha restaurant yarurira amafaranga macye cyane muri Kigali werekeza mu bice biri hafi y’uducentre dukomeye nka Nyabugogo, Giporo, Sonatubes, Kicukiro-Centre, Ziniya, Gatsata y’abakanishi na Gakinjiro mu mujyi.
Henshi hahendutse cyane isahani y’ibiryo (bo bita ipula: plat) bayarurira 500Rwf cyangwa 400Rwf. Isahani y’ibishyimbo, umwumbati, akawunga, agaceri gacye n’agasosi karekuye cyane kajya kuba umweru, hamwe na hamwe n’utuboga twa dodo. Bishyushye.
Umuseke wabashije kubona restaurant yarurira 300Rwf gusa ku isahani y’ibiryo muri Kigali. Iyi nta zina, nta cyapa, nta BP nta bintu byinshi, igana abayizi n’abayirangiwe gusa.
Iherereye mu mudugudu wa Gatare, akagali ka Niboye Umurenge wa Niboye muri Kicukiro. Aha biranoroshye gufotora ku meza yabo, i Nyarutarama cyangwa mu Kiyovu bisaba kwandika ubisaba bakazagusubiza.
Jean Pierre Kayihura ayicuruzamo, avuga ko abanyonzi, abayede (Aide Maçon),abakora isuku, abacuruza utuntu ducye cyane n’abava mu byaro baje i Kigali bafite amafaranga macye aribo ‘baclients’ babo.
Kayihura ati “ubu se ari wowe umuntu umunyonzi wamuca angahe kw’ipula? kandi uziko na 500 atayabonye.”
Abaharira baganiriye n’Umuseke bavuga ko restaurants nk’izi zibafasha cyane kuko zituma badasonzera muri Kigali. Naho ku isuku nke iba ihari ngo ntibayinubira kuko ijyanye n’ubuzima baba basanzwe babaho.
Abatuye i Kigali bafata amafunguro hanze yo mu rugo mu masaha runaka bose bajya hagati y’ibi byiciro byombi.
Photos/JP Nkundineza/Umuseke
Jean Paul NKUNDINEZA
UM– USEKE.RW
English
16 Comments
Ni byiza cyane kugira umujyi ibyiciro byose byibonamo , buri wese akabona ibyo ara bijyanye n’ubushobozi bwe. Erege burya twese turunganirana!
Yeah this is life!
God created equal people but World made them #nt.
Some eat at heaven others eat so hardly
Life
bibaho gusa nibyiza ko buri wese yagira aho yibona 2! erega abantu tuba turi ku gahigo natwe tugomba kugerayo nahubundi isuku nke ntago idukanga kuko ntiwa wiriwe utunda imyanda unaterura imizigo ngo wange kujya muri 300 twe twita kuri mutuel wangu
Thanks Umuseke!!!!!!!! Iyi n’inkuru nziza
waoh, ikiza ni uko buri wese agira aho yisanga akifata neza uko ashoboye bitewe n’umufuka we. igishimisha ni uko iherezo ari rimwe! ku iherezo rya buro wese ntawukangisha ko yaryaga isahani ya 30000frw! Imana ni nziza.
Iyi nkuru ndayishimye ariko ni ntoya ugereranyije nuko nayitekereje nkibona titre yayo.ikindi umuntu yakwibaza niba ntakuntu wagurisha make ariko ukagira nisuku??twiheshe agaciro. Ubundi twajyaga tubakundira amafoto menshi none byagenze gute?
isuku yibiryo bya 300 nawe shyira mugaciro koko??inzu nziza yakodeshwa iki?ameza meza cg intebe byagurwa iki?? amasahani tuvugeko aba yogeje ariko se isuku kokosinziiii nawe balance wumve ukurikijr uko isoko rimeze
Haha.. Unvugiye Ibintu kabisa!!!!!
Mumukozeho
keza we? byihorere ntawanga aheza arahabura. wari Uzi ko n’iryo funguro rya 300 hari abataribona? ubwo se urumva wakora iki ngo uwo muntu nawe ajye muri ya Restorent yanyayo? Ahaaa nidanje.
sha iyi nkuru ni fresh kbs, mujye mutuzanira n izindi nkuru nk izi zubushakashatsi bwo muri quartier
Muri Magnificat iherereye muri Economat General i Kigali,ayo ufite yose ubona icyo urya
kandi isuku ni yose. Burya ubona saa sita abantu bagabanutse mu mugi i Kigali, ni aho baba bibereye.
Muri Magnificat iherereye muri Economat General i Kigali,ayo ufite yose ubona icyo urya
kandi isuku ni yose. Burya ubona saa sita abantu bagabanutse mu mugi i Kigali, ni aho baba bibereye.
Imana ni umukozi w’umuhanga. Hari ukuntu yahaye bantu bose kureshya,yahaye buri wese kwishima no kubabara muri iyi si. Uziko n’aba barira 300 Frw muganiriye yakubwira ko nta kibazo afite ukabona yishimiye ubuzima abayeho kuko Imana imuha trois cent akarya bityo ntapfe ? We yakubwira ko kurya imyumbati n’ibishyimbo ukarenzaho urwagwa, mukaru, amazi nta kiza nkabyo. Ikindi gitangaje ni uko aba bantu bose nibapfa bazajya hamwe, ndetse wasanga uriya urira 30000 Frw arwaye indwara nyinshi zikaze kurusha urira 300 Frw. Gukena sibyo nshyigikira ariko nagirango mbereke ukuntu Imana ikunda buri wese.
Ndasuhuza abantu bose baririye nyagatovu kimironko cyane abanyeshuri ba KIE kuri 250! they used to call these places “kill me quickly” but thanks God i am still alive!
Mwiriwe ,igitangaje nuko abishyura 30,000 frw na bishyura 300 frw bose kumafunguro yabo aba ariho umuceri,ibirayi,ibijumba ,ibishyimbo,amazi,amavuta,…… biba ari bimwe ,rimwe narimwe usanga ibidafite ingaruka kumubiri ari abya 300 , uti kuberiki ? ibya 30,000 frw usanga harimo ibyo birungo byishi, amavuta menshi ,inkuko zimaze nkicyumweru zivutse nibindi byishi, ….ariko abobose bababishimye.
Comments are closed.