Kiyovu irabasha guhindura amateka mabi imbere ya APR FC?

Kuri uyu wa gatandatu Kiyovu sports ya Yves Rwasamanzi, irakira APR FC mu mukino w’ikirarane wo ku munsi wa cumi wa shampiyona. Kiyovu Sports iheruka gutsinda APR FC muri shampionat mu myaka igera ku 10 ishize.

Hashize imyaka irindwi Kiyovu Sports itabona inota kuri APR FC, ubwo iheruka kunganya nayo (1-1) hari tariki 11/5/2008. Imyaka ikaba ibaye icumni kandi Kiyovu idatsinda APR FC muri shampiyona kuko ibiheruka tariki 30/10/2005 mu mukino wo kwishyura wa shampiyona, Kiyovu yatsinze ibitego 3-1.

Kuva 2010, APR FC yatsinze Kiyovu Sports imikino 12 yose ya shampiyona, ikaba ari yo yashoboye kuyikuraho amanota menshi kurusha izindi, (36).

Muri iyi mikino 12, ikipe ya APR FC yinjije ibitego 30 mu izamu rya Kiyovu, mu gihe yo yinjije mu rya APR FC ibitego 3 gusa!!

APR FC iharanira kwegera amakipe ari imbere, iri ku mwanya wa gatanu n’amanota 18, irarusha Kiyovu Sports ya gatandatu inota rimwe gusa.

Ikipe ya Kiyovu irakina uyu mukino wa kabiri iri kumwe n’umutoza mushya Yves Rwasamanzi. Ni nyuma yo gutsinda  Rwamagana City igitego 1-0.

Jean Claude Iranzi na Janvier Benedata ba APR FC, baraba bahura n’ikipe ya Kiyovu Sports bigeze gukinira.

Suleyman Kakira na Lomami Andre baza kuba bahura n’ikipe ya gisirikare banyuzemo mu myaka ishize.

Djuma Nizeyimana ku ruhande rwa Kiyovu na Bernabe Mubumbyi ku ruhande rwa APR FC, ntabwo baza gukina uyu mukino kubera ibibazo by’amakarita y’umuhondo.

Imihigo ni yose ku mpande zombi:

Rwasamanzi Yves utoza Kiyovu Sports, yatubwiye ko n’ubwo APR FC ari ikipe ifite izina rinini kandi ishobora Kiyovu nkuko byemezwa n’amateka, ariko ngo barashaka kuyitsinda bagakuraho ayo mateka.

Rwasamanzi ati “Turashaka gutsinda uyu mukino. APR iraturusha inota rimwe gusa, ndumva nshaka ko tuyitsinda tukayicaho, tukanakuraho amateka avuga ko Kiyovu itajya ishobora APR.

Umutoza wa APR FC, Rubona Emmanuel we aratangaza ko umukino wa Kiyovu awubona mo intego ebyiri.

“Turashaka kwegera amakipe aturi imbere ariko simbona ko uza kuba umukino utandukanye ngo kuko ari Kiyovu, turawutegura nk’iyindi yose. Ikindi kandi, ugomba kudufasha kwitegura umukino wo kwishyura wa ‘champions league’.”

Imikino ya shampiyona yaraye ibaye:

AS Kigali itari ifite Sugira Ernest kubera ibibazo by’imvune yatsinze Etincelles ibitego 4-2.

Iyi kipe iyoboye urutonde rwa shampiyona by’agateganyo yatsindiwe na Onesme Twizeyimana (2), Muzerwa Amini (1), na Rodrigue Murengezi.

Sunrise ku kibuga cyayo, yatsinze AS Muhanga ibitego 3-0, mu gihe Gicumbi FC yatsinzwe na Bugesera FC igitego 1-0.

Roben NGABO
UM– USEKE.RW