Obama yahamagaye Poutine amusaba guhagarika ibitero kuri Syria

Perezida wa USA Barack Obama yasabye mugenzi we w’Uburusiya Vladimir Poutine guhagarika ibitero by’indege ku mitwe irwanya Leta ya Bashar Al Assad ngo bigendanya n’amasezerano mpuzamahanga bumvikanye i Munich kuwa kane nk’uko byatangajwe n’ibiro bya Obama kuri iki cyumweru.

Obama ngo yahamagaye kuri Telephone Poutine kuwa gatandatu amusaba ko bahagarika ibitero by’indege zabo ku barwanya ubutegetsi muri Syria nk’uko biri mu itangazo rya White House nk’uko bitangazwa na Associated Press.

Ibiganiro byabo kuri Telephone ngo byarasubitswe bongera kuvugana ku cyumweru ku busabe bwa Kremlin (Ibiro bya Perezida mu Burusiya) bavugana kuri ariya masezerano mpuzamahanga areba ikibazo cya Syria.

Nubwo iri tangazo ritavuga igisubizo Poutine yahaye Obama, rivuga ko ngo bombi bumvikanye ku kuba hafungurwa inzira igera ku duce twazahajwe n’imirwano kugira ngo abaturage bariyo bagezweho imfashanyo.

Ibihugu 17 biri mu kiswe ISSG birimo USA, Russia, Arabie Saoudite, Iran, Turquie n’ibindi kuwa kane byahuriye i Munich byiyemeza guhagarika imirwano muri Syria no gufungura inzira igeza imfashanyo ku baturage bari ahari imirwano.

Nubwo bari babyumvikanye ariko nyuma yabwo umuriro wakomeje kwaka mu mijyi imwe yo mu majyaruguru ya Syria, Uburusiya na Turkiya bikomeye gushinjwa kwatsa umuriro.

Mu biganiro byabo kuri Telephone, Poutine na Obama, bayoboye ibihugu bitajya birebana neza kuri Politiki y’isi, ngo babashije kumvikana ko bazajya bakomeza kuvugana ku kibazo cya Syria.

UM– USEKE.RW