Karongi: Imyaka 3 ishize bategereje ko REG ibishyura imitungo babariwe

Abaturage batuye muri Kagarama, mu  kagali ka Kibirizi, umurenge wa Rubengera barinubira ko bamaze imyaka itatu barabariwe imitungo ahagomba kubakwa amapoto manini azacamo umuriro, (abaturage ngo babwirwaga ko uzavanwa mu gihugu cya Ethiopia),  kuva mu 2013 ariko n’uyu munsi ntibarahabwa ingurane.

Bwa mbere abaturage babariwe muri 2007 hanyuma babwirwa ko umushinga wapfuye byahindutse. Bongeye kubarirwa mu mwaka wa 2013, ariko kugeza ubu amaso yaheze mu kirere.

Aya mapoto afata ubuso bwa metero 8 ku 8,  abaturage bavuga ko batagihinga kubera ko iyo bahinze imyaka yabo abakozi b’uyu mushinga bayinyukanyuka, bityo bigatuma badahinga kuva mu mwaka wa 2014.

Bavuga ko batunzwe n’ibyo bahaha mu isoko.

Ubwo twajyagayo twasanze abakorera uyu mushinga babujijwe gukora n’abaturage, ariko umwe baza kumujyana ku murenge bamwizeza ko baza mukorere ubuvugizi ariko uwo muturage we avuga ko ariko bahora babwirwa.

Mberabagabo  Elias, umwe mu bangirijwe imyaka yagize ati “Baraje baturandurira imyumbati, badutemera ibiti bya avocat, ubu inzu zacu bazizirikaho imigozi ifashe amapoto zatangiye gusenyuka.”

Aha yerekanaga imwe mu nzu yaziritsweho imigozi ihita ihirima kandi ntacyo yishyuwe. Avuga ko inzara igiye kubica kubera ko batasaruye nk’abandi.

Avuga ko nibura we ayo yabariwe ari miliyoni imwe n’ibihumbi magana abiri na mirongo ine. Ariko kuva mu 2013 amaso ye yaheze mu kirere, ntibishyurwa.

Mukarusanga Claudine yavuze ko batanga ibikorwa by’iterambere, ariko nibura ngo bakwiye kureba uburyo bakemurirwa ikibazo.

Ati “Ubu batangiye imirimo yo kubaka muri 2014 mu ntangiriro z’uwo mwaka, ariko na n’ubu imyaka yacu baraje baranyukanyuka, ibiti by’avoka baratema, ikawa sina kubwira, ubu dutunzwe no guhoza agafuka ku mutwe duhaha.”

Akomeza agira ati “Sinagakwiye kujya guca inshuro mfite aho nagahinze, nzi gukora rwose ariko se ko duhinga bakabinyukanyuka bubaka amapoto twahisemo kubireka nyine.”

Avuga ko yifuza ko babishyura kandi bakanabasanira inzu zabo zangijwe n’uyu mushinga.

Ku itariki ya 28 z’uku kwezi dushoje, mu nama n’abanyamakuru nyobozi icyuye igihe ku Karere ka Karongi, yabajijwe kuri icyo kibazo, Hakizimana Sebastien Visi Mayor ushinzwe ubukungu, avuga ko icyo kibazo kireba ikigo cy’amashanyarazi REG.

Umukozi wa REG ku rwego rw’akarere avuga ko atemerewe kugira icyo abivugaho.

Abahinde twasanze bari kubaka iki gikorwa bo bavuze ko nta nshingano bafite zo kwishyura abaturage ko ibyo bireba REG.

Sylvain Ngoboka
UM– USEKE.RW