Somalia: Abagera kuri miliyoni 5 bugarijwe n’inzara

Umuryango w’Abibumbye (UN) n’indi miryango itanga imfashanyo irahamagararira amahanga gutanga imfashanyo ya miliyoni 885 z’Amadolari yo gufasha abantu basaga miliyoni 5 bugarijwe n’inzara ikabije muri Somalia.

Muri abo abagera ku 310 000 ni abana bugarijwe n’ibibazo by’indwara ziterwa n’imirire mibi, kandi ngo mu gihe Isi itatabarira hafi aba bana ubuzima bwabo bwakomeza kujya mu kaga.

Ibikorwa byo gutanga ubufasha muri iki gihugu byakomwe mu nkokora n’ikibazo cyo kubura amafaranga ahagije, intambara ndetse n’imvura imvura nyinshi yagiye igwa mu bice bitandukanye by’iki gihugu.

Uhagarariye umuryango w’Abibumbye ishami rishinzwe imfashanyo muri Somalia, Peter De Clercq yashimye cyane iyo mpuruza yatanzwe na UN.

Yanavuze ko iyi mpuruza izafasha n’Abanyasomalia bagera kuri miliyoni 1,1 bavuye mu byabo bahunga intambara n’ibitero by’Umutwe w’inyeshyamba zigendera ku matwara akaze ya Islam wa Al shabaab.

Muri iki gihugu cya Somalia hari uturere tuza imbere mu kuzahazwa n’inzara kurusha utundi,  aritwo Baidoa, Bossasso, Gaalkayo, Kiismayo n’umurwa mukuru Mogadishu.

Callixte NDUWAYO
UM– USEKE.RW