Igisasu cyahitanye abantu 10 Istanbul muri Turkiya

Nibura abantu 10 bapfuye 15 barakomereka kuri uyu wa kabiri mu gitondo i Istanbul mu guturika gukomeye bivugwa ko ari igikorwa cy’iterabwoba nk’uko abayobozi baho babitangaza. Igisasu cyaturikiye mu gace kitwa Sultanahmet gakunze kugendwamo cyane n’abakerarugendo hafi y’Umusigiti w’ubururu. CNN ivuga ko mu bakomeretse harimo Abadage batandatu.

Turkiya isanzwe n’ubundi iri mu bihe bidasanzwe nyuma y’uko mu kwezi kwa 10/2015 igisasu cyaturitse i Ankara kikica abantu 103, igikorwa kigambwe n’umutwe wa Islamic State.

Igisasu cyaturitse kuri uyu wa kabiri cyaturikiye hafi ya Bazilika ya Sainte-Sophie n’Umusigiti w’Ubururu, inyubako zombi zikunzwe cyane gusurwa n’abakerarugendo benshi muri Istanbul.

Kugeza ubu biravugwa ko iki gisasu cyaturikijwe n’umuntu wari wakizirikiyeho.

Umwe mu Badage warokotse yabwiye AFP ko guturika kwari kuremereye cyane, ko byateye umutingito ubundi akabona ibice by’imibiri y’abantu byuzuye mu muhanda.

Imibare ya mbere y’abapfuye yatangajwe n’ibinyamakuru muri Turkiya ni abantu 10 na 15 bakomeretse, imibare ishobora guhinduka.

Umwe mu bayobozi muri Turkiya yatangaje ko batekereza ko iki gitero cyagabwe n’abakora ibikorwa by’iterabwoba.

Muri Mutarama 2015 umu kamikaze yiturikirijeho igisasu ku biro bya Police y’aha Sultanahmet akomeretsa abapolisi babiri.

Mu Ukwakira 2015 i Ankara naho haturikiye igisasu kiremereye cyane gihitana abantu 103.

Mu Ukuboza 2015 ku kibuga cy’indege cya Sabiha Gökçen muri Istanbul ho harashwe igisasu gihitana umuntu umwe.

Ibitero byose bigendanye n’iterabwoba kuri Turkiya.

UM– USEKE.RW