Burundi: Amnesty International yashinje ingabo za Leta kwihorera ku baturage

Umuryango mpuzamahanga wita ku burenganzira bwa muntu, Amnesty International wasohoye reporo ishinja Leta y’U Burundi kwica abaturage binzirakarengane ku itariki ya 11 Ukuboza ubwo ibigo bya gisirikare bitatu byagabwaho ibitero.

Uyu muryango uvuga ko ubu bwicanyi ndengakamere bwakozwe tariki ya 11 Ukuboza 2015 ubwo ibigo bitatu bya gisirikare mu murwa mukuru Bujumbura byagabwagaho ibitero n’abantu bigahitana abasirikare umunani.

Iyi raporo ivuga ko ubushakashatsi bwakomeje gukorwa n’umuryango Amnesty International bwerekanye ko nyuma y’ibyo bitero ngo igisirikare n’igipolisi cyahise kirara mu ngo z’abaturage bakajya batwara abaturage kubica, ibyo bikorwa byaguyemo abaturage b’inzirakarengane benshi.

Kuri uwo munsi abapfuye abantu 87 Leta y’U Burundi yavuze ko umunani muri abo bari abasirikare naho abandi ngo bari abarwanyi. Ariko umuryango mpuzamahanga urengera uburenganzira bwa muntu, Amnesty International ibi wabiteye utwatsi uvuga ko abenshi bishwe bari abaturage binzirakarengane.

Iyi raporo ivuga ko hari benshi bagiye bavanwa mu nzu zabo bakabajyana kubica babarashe.

Nyuma y’uko abo bantu bapfuye bangana batyo umuryano wa Afurika yunze ubumwe wahise wanzura ko ugiye kohereza ingabo 5000 muri iki gihugu ngo zijye kurinda abaturage.

Gusa iki cyemezo cyamaganiwe kure na Leta y’U Burundi, ndetse no kuri uyu wa mbere inteko ishinga amategeko y’iki gihugu yanze izo ngabo, yavuze ko idashyigikiye icyo cyemezo.

Guverinoma y’U Burundi ntacyo iratangaza kuri iyi raporo.

BBC

Callixte Nduwayo
UM– USEKE.RW