Kasirye Devis ngo ashobora kutagaruka muri Rayon kubera umweenda

Rutahizamu wa Rayon sports Davis Kasirye amaze ukwezi atari kumwe n’ikipe kubera kutishyurwa umushahara w’ukwezi kw’Ugushyingo, ndetse n’uduhimbazamusyi tw’imikino imwe ya shampiyona. Yabwiye Umuseke ko atazagaruka muri iyi kipe batamwishyuye. Umuseke wagerageje kuvugana n’ubuyobozi bwa Rayon ariko kugeza ubu ntibirashoboka.

Kasirye Davis umaze gutsinda ibitego bine mu mikino icyenda ya shampiyona aravuga ko atishimiye uburyo yafashwe n’ubuyobozi bwa Rayon sports.

Ngo birengagiza inshingano zabo kandi abakinnyi bo baba bakoze ibyo bashinzwe, yabiwye Umuseke ko atarishyurwa ukwezi kw’Ugushyingo, ikaba ariyo mpamvu yatumye adakina imikino yari yateguwe ku bufatanye bwa Rayon sports na Star Times.

Kasirye ubusanzwe uhembwa ku itariki 15 za buri kwezi,  ati “Rayon sports ni ikipe nkunda, gusa ni ubuzima bugoye. Cyane ku bantu bafite inshingano zo kwita ku muryango. Ukwezi kurashize nsabye ubuyobozi kumpa amafaranga ngo noherereze umuryango wanjye. Nasabaga gusa umushahara w’ukwa 11, ariko mu kunsubiza bambwiye ko nta mafaranga na mba bafite.

Nari mfite utubazo mu muryango,nari nkeneye amafaranga. Nababwiye ko ntashaka kugenda, ahubwo ko ari ayo kohereza nkakomeza akazi. Ntago banyumvise.”

Kasirye avuga ko yahise ajya iwabo kwegera umuryango ngo awegere muri icyo kibazo. Nyuma abayobozi ngo bamwoherereje amafaranga macye ngo agaruke n’ibindi babikemure, aragaruka ariko ngo akomeje kubona ko badashaka kumwishyura yongera gusubira iwabo.

Mu mpera z’ukwezi kwa 11, ubwo Umuseke wasuraga imyitozo y’iyi kipe, i Nyanza umutoza w’iyi kipe Jacky Ivan Mineart yari yadutangarije ko uyu musore ari mu gihugu cy’ubugande kubera ikibazo cy’ibyangombwa.

Amakuru agera ku Umuseke aremeza ko usibye we (Kasirye) wahawe igice cy’umushahara w’ukwa 11, abandi bo amaso aracyari mu kirere.

UM– USEKE.RW