Burundi: Gen Ndayirukiye n’abandi 27 bashinjwa guhirika ubutegetsi bagejejwe mu rukiko

Kuri uyu wa mbere mu gihugu cy’U Burundi, bwa mbere abantu 28 bashinjwe kugerageze guhirika ubutegetsi bwa Pierre Nkurunziza, barimo na Gen Cyrille Ndayirukiye bagejejwe mu Rukiko rw’Ikirenga ngo rubaburanishe ku byaha bakurikiranyweho.

Aba bantu bose bazaburanishwa n’urukiko rw’ikirenga ariko baburanishirizwe i Gitega kuko ariho bafungiye. Muri bo harimo abasirikare bafite ipeti rya General n’abandi bafite amapeti makuru n’abapolisi.

Ibiro Ntaramakuru, Reuters bivuga ko Gen Cyrille Ndayirukiye wavuzwe mu bihe bya Coup d’Etat n’abandi basirikare bafite ipeti rya General batanu, bari muri abo bantu 28, bagejejwe imbere y’Urukiko kuri uyu wa mbere.

Aba bose barashinjwa ibyaha bitatu; Gushyira mu ngiro umugambi wo guhirika ubutegetsi no gukangurira abaturage gufata intwaro ngo barwanye Leta, Kwica abashinzwe umutekano n’abaturage ndetse no Gusenya ibikorwa n’inyubako nyinshi.

Aba basirikare n’abapolisi bashinjwa ibi byaha bavuze ko bafunzwe nk’inyamanswa, kandi ko badashobora kuburana mu gihe uburyo bafunzwemo budahinduwe.

Bamwe bumvikanye bagira bati: “Ntawagera imbere y’urukiko atari umuntu, nimubanze mudusubize ubumuntu mbere y’uko tuburana.”

Bavuze ko bafungiwe mu cyumba cy’umwihariko, kandi ngo aho barara niho bituma.

Banasabye kandi ko bahabwe dosiye y’urubanza rwabo kuko ngo bayiheruka mu kwezi kwa gatanu. Bamwe banavuze ko ababunganira batarahagara.

Iri buranisha ryatangiye nyuma y’uko kuwa gatanu abantu 87 baguye mu mirwano yahuje ingabo za Leta n’abantu bari bitwaje intwaro.

Kugeza ubu mu Burundi hamaze gupfa abantu barenga 300 kuva mu kwezi kwa kane ubwo Perezida Pierre Nkurunziza yatangazaga ko aziyamamariza kuyobora manda ya gatatu.

Tariki 13 Gicurasi 2015 Gen. Niyombare Godefroid yatangaje ko yahiritse ubutegetsi bwa Nkurunziza wari mu nama muri Tanzania. Gusa ntibyatinze kuko Nkurunziza yaragarutse aguma kuyobora igihugu. Kugeza n’ubu muri iki gihugu nta munsi ushira hadatoraguwe imirambo y’abantu bishwe.

Callixte NDUWAYO
UM– USEKE.RW