Diamant nini ku Isi mu myaka 100 ishize yacukuwe muri Botswana

Ibuye rya Diamant rifite carat 1 111 (hafi 222g) ryacukuwe mu kirombe cya Karowe muri Botswana muri iki cyumweru, iri buye ryenda kungana n’agapira bakina muri Tennis niryo rinini rivumbuwe kuva mu myaka irenga 100 ishize nk’uko byatangajwe na kompanyi icukura diamant muri aka gace yitwa Lucara Diamond Corp.

Ikirombe cya Karowe gisanzwe ubundi gihangana n’icya  Letseng cyo muri Lesotho nacyo kizwiho gucukurwamo za Dimants nini nk’uko bitangazwa na Bloomberg.

Diamant ubu yari ifite agahigo ko kuba nini mu ziheruka vuba ni iyacukuwe aha muri Lesotho ifite carat 603.

Kuri uyu wa kane, Edward Sterck inzobere mu bucuruzi bw’amabuye y’agaciro yanditse ko urebye bidashoboka kumenya agaciro k’ibuye nk’iri ringana gutya bidasanzwe ryacukuwe kuko ngo byaterwa n’ibintu byinshi birimo ibara, uko ribonerana, uko rityaye n’utundi tuntu twinshi.

Kompanyi yacukuye iri buye ya Lucara mu kwezi kwa karindwi uyu mwaka yagurishije Diamant bari bacukuye ari ibuye rimwe ifite 341.9 carat (68g) ryaguzwe miliyoni $20.6. ikigereranyo cya $60,000 kuri carat imwe.

Ibuye rinini rya Diamant ryacukuwe mu mateka ni mu 1905 i Pretoria muri Africa y’epfo, ryari rifite 3,106-carat (621g)

Diamant ni ibuye rihenze cyane cyane, ndetse Diamant itukura iza ku mwanya wa kabiri mu mabuye ahenze cyane ku isi inyuma y’iryitwa Jadeite rishobora kugura hejuru ya miliyoni 3$ kuri carat imwe gusa. Jadeite ni ibuye riboneka gacye cyane risa n’icyatsi kubisi, aho riheruka kuboneka ni muri Guatemara.

UM– USEKE.RW