500 000Rwf acibwa uwagonze umuntu agapfa hari abavuga ko ari akarengane

Bikubiye mu gitabo cy’amategeko ahana mu Rwanda, ubu kiri kuvugururwa, mu ngingo yacyo ya 952 iteganya amande ahanishwa uwakoze amakosa yo mu muhanda. Umuntu wese utwaye imodoka akagonga umuntu agapfa ahita acibwa amafaranga ibihumbi magana atanu, nubwo biteganywa n’Itegeko abatwara imodoka baganiriye n’Umuseke bavuga ko igihano nk’iki cyagombye gutangwa ari uko byemejwe n’Urukiko ko uwagonze umuntu akamwica ari we wari mu makosa, maze ibindi bihano birenzeho n’ibireba ubwishingizi nabyo bikaba byakurikira.

Deo Mutabazi umushoferi utwara taxi voiture mu mujyi wa Kigali mu gace ka Remera yabwiye Umuseke ko ushobora kuba utwaye imodoka umuntu akambuka umuhanda atarebye imodoka ikamugonga ikamuhitana atari amakosa y’utwaye.

Akongeraho ko buri gihe impanuka ibereye mu muhanda hagati y’ikinyabiziga n’umunyamaguru itaba isobanuye ko utwaye ikinyabiziga ari we uri mu makosa bityo ko ariya mande hari ubwo ashobora kuba akarengane.

Murenzi Samson we utwara imodoka ye bwite nawe avuga ko amande y’ibihumbi magana atanu acibwa utwaye imodoka yagonze umuntu agapfa hari ubwo gishobora kuba akarengane kuko umuntu ashobora kugongwa agapfa kubera amakosa ye.

Murenzi ati “Ibintu nk’ibi bijyanye n’ibihano n’amande nko ku rupfu rw’umuntu mu muhanda ntabwo bikwiye gufatirwa imyanzuro ihutiweho. Byagombye kurekerwa inkiko zikabifataho umwanzuro zimaze gushishoza ku byabaye. Amafaranga ibihumbi magana atanu ni menshi cyane ku muntu utari mu makosa, ni akarengane kuri we kandi birashoboka cyane ko wagonga umuntu ku makosa ye.”

Spt JMV Ndushabandi umuvugizi wa Police y’u Rwanda ishami ryo mu muhanda yabwiye Umuseke ko kuri iyi ngingo itegeko risobanutse neza.

Avuga ko ingingo ya 592 ivuga ko umushoferi ugonze umuntu umwe akamukomeretsa ku buryo bwamumugaza cyangwa bukamwangiza bikomeye bitewe n’uko umushoferi yirukaga, yashakaga guca kuri mugenzi we cyangwa yasuzuguye ibimenyetso by’amatara yo ku muhanda, ahanishwa igifungo kiri hagati y’iminsi umunani n’amezi abiri cyangwa agatanga amande ari hagati y’ibihumbi 100 n’ibihumbi 500 cyangwa kimwe muribyo.

Ariko kandi ibi ngo bigaterwa n’umubare w’abapfuye cyangwa abakomerekejwe

Iyi ngingo isobanura ariya makosa atuma umuntu agonga umunyamaguru, gusa ngo muri rusange ugonze umuntu wese ahita acibwa ariya mande cyangwa agafungwa nk’uko abashoferi bo babivuga.

Steven Gatari umunyamategeko waganiriye n’Umuseke kuri iyi ngingo avuga ko igifungo giteganywa nayo ari icyo kurinda uwagonze umuntu cyangwa bagapfa ko yagirirwa nabi n’abo ku ruhande rw’uwapfuye. Ko nyuma ubutabera buca urubanza harebwe buri kimwe kigaragaza uko impanuka yagenze n’ibyo yangije n’impamvu zayiturutseho.

Spt Ndushabandi we avuga ko ariya mategeko abereyeho  kurinda icyo ari cyo cyose cyashyira ubuzima bw’abakoresha umuhanda mu kaga.

Yasabye abakoresha umuhanda bose kwibuka ko biri mu nyungu zabo kwirinda gukora cyangwa guteza impanuka.

Kuri we ngo kwishyura amafaranga uko yaba angana kose si ikibazo, ahubwo icya ngombwa ni ukuba maso ku bantu bose bakoresha umuhanda.

Amafaranga ibihumbi magana atanu acibwa uwagonze umuntu agapfa ashyirwa mu kigega cya Leta.

Jean Pierre NIZEYIMANA
UM– USEKE.RW