Uganda: Kandidature ya Besigye yemewe, agiye guhatana ku nshuro ya 4

Komisiyo y’amatora mu gihugu cya Uganda yaraye yemeye ‘candidature’ ya Dr Kizza Besigye  utavuga rumwe na leta ya Uganda. Ni ku nshuro ya Kane agiye guhatana mu matora y’umukuru w’igihugu.

Iyi candidature ya Kizza Besigye yemewe na komisiyo y’amatora muri Uganda nyuma yo kwemera indi ya Amama Mbabazi na we ukomeje kuvuga ko Museveni akwiye kurekura ubutegetsi mu mahoro kuko imiyoborere ye itajyanye n’ibihe igihugu cya Uganda kigezemo.

Besigye yemerewe kuzahangana mu matora y’umukuru w’igihugu cya Uganda nyuma yo kwemezwa n’umubare munini w’abarwanashyaka ba FDC; ishyaka ritavuga rumwe na Leta ya Uganda.

Mu nama yakoresheje nyuma yo kwemererwa candidature; Besigye yagize ati “inzego dufite uyu munsi ntabwo ari inzego z’abaturage ba Uganda ; ni inzego z’abantu bashaka kwigarurira ububasha n’imitungo by’igihugu cyacu. Mu by’ukuri ni inzego zikoresha igitugu.”

Mu kwezi gushize uyu mugabo Dr Besigye wahoze ari umuganga wa Museveni yafatiwe iwe ajya gufungirwa kuri ‘station’ ya polisi ya Naggalama ashinjwa gutegura amanama atubahirije amategeko. Icyo gihe uyu mugabo na we yashinjaga polisi kudaha ubwisanzure impande zose mu gihugu.

Dr Kizza Besigye amaze guhangana na Museveni inshuro eshatu mu matora y’umukuru w’igihugu. Uyu mugabo akaba yarakunze gufungwa ashinjwa guhungabanya umudendezo n’ituze by’igihugu ubu akaba yiteguye kuzahatanira kuyobora Uganda mu matora ateganyijwe kuba kuwa 18 Werurwe umwaka utaha.

Iyi candidature ya Kizza Besigye ije ikurikirana n’iya Amama Mbabazi wiyemeje kuzahatanira gusimbura Museveni; uyu mugabo wiyemeje kwiyamamaza nk’umukandida wigenga nyuma yo kwitandukanya n’ishyaka rya NRM riri ku butegetsi riherutse kwemeza Yoweri Kaguta Museveni  nk’umukandida waryo.

UM– USEKE.RW