Muhanga: Isoko rya Misizi ntirigira ubwiherero

Mu nama y’umunsi umwe yahuje abakozi bashinzwe imibereho myiza kuva ku tugari, imirenge, akarere, n’abacuruzi bose bakorera mu mujyi wa Muhanga batangaje ko abarema isoko rya Misizi bafite ikibazo cyo kubona aho biherera, bagasaba inzego z’ubuyobozi bw’akarere ka Muhanga ko zibafasha  gukemura iki kibazo.

Iyi nama yari igamije kurebera hamwe  uko ikibazo cy’isuku gihagaze mu karere ka Muhanga ndetse n’ingamba zafatwa kugirango umujyi n’ibice by’imirenge y’icyaro abaturage baho barusheho kugira isuku ku mubiri no ku myambaro ari nako basukura aho batuye barengera n’ibidukikije.

Abitabiriye iyi nama bakunze kurema isoko rya Misizi babwiye ubuyobozi bw’Akarere ka Muhanga ko  hari umwanda  ukabije wugarije isoko rya Misizi bitewe n’uko nta bwiherero iri soko rigira kuva ryatangira  kugeza uyu munsi.

Bagize bati “Murebye umubare w’abaturage barema isoko rya Misizi mwagombye kwita kuri iki kibazo cyo kububakira ubwiherero kandi ntabwo batahwemye kubivuga ariko nta gisubizo babona”

Niyitegeka Jeanne  Umukozi ushinzwe imibereho myiza y’abaturage mu murenge wa Shyogwe, yemeye ko nta bwiherero iri soko rya Misizi rigira, ariko akavuga ko kutaryubaka byatewe n’aho isoko  ryubatse kubera ko ari hafi y’igishanga bityo kubona ubutaka  bikaba byaragoranye, gusa yongeyeho ko  hari umuntu wabahaye ubutaka buri mu isambu ye, bateganya kubakamo ubwiherero kuburyo muri uku kwezi kwahariwe ibikorwa by’isuku bazababarangije  kubwubaka.

Ibi byemejwe kandi n’Umukozi mu karere ka Muhanga ushinzwe iterambere ry’ubuzima no kwirinda indwara Kamana Sosthène wasabye umurenge wa Shyogwe kwihutira  kubaka ubwiherero  byakwanga rikaba rifunze  mu gihe gito kugeza umunsi  ubwiherero buzubaka.

Usibye ikibazo cy’isoko rya Misizi ritagira ubwihero, muri iyi nama hanavuzwe n’ikibazo cy’abaturage  bamena imyanda yo mu ngo aho babonye  muri uku kwezi  kwahariwe ibikorwa by’isuku, bamwe mu bafatanyabikorwa b’akarere ka Muhanga bavvuze ko bagiye  kwigabanyamo  ibyiciro bitandukanye bizakurikirana ibikorwa byo kuonza isuku  hirya no hino mu mirenge 12 igize aka karere.

MUHIZI Elisee
UM– USEKE.RW-Muhanga.