Imirenge SACCO imaze kwibwa miliyoni 600 Rwf

Kuri uyu wa kane ubwo Minisitiri w’Ubucuruzi n’Inganda yitabaga Komisiyo y’Ubucuruzi n’Inganda mu Nteko Nshingamategeko y’u Rwanda, umutwe w’abadepite, yavuze ko mu bibazo bikomereye Cooperative Imirenge SACCO zagize harimo imikorere ya kera yatumye zibwa amafaranga agera kuri miliyoni 600 harimo miliyoni 400 yibiwe ku mafishi, mu gihe cy’imyaka itandatu ishize.

Minisitiri Francois Kanimba yagomba gutanga ibisubizo ku bibazo abadepite bagize iyi komisiyo babonye mu mirenge SACCOs 90 basuye hagati ya tariki 20 Gicurasi 2015 na tariki ya 11 Kamena 2015.

Muri bimwe mu bibazo byagaragajwe n’abadepite harimo kuba Imirenge SACCOs ikoresha uburyo gakondo (kwandika ku mafishi/fiches) bigatuma ibi bigo byari byashyiriweho abaturage bo hasi ngo bige kubitsa no kwiguriza byibwa amafaranga ku buryo bworoshye.

Mu bindi bibazo byabonywe n’abadepite aho basuye, ni ukuba umubare w’abagore n’urubyiruko bitabiriye za SACCOs ari muto cyane. Hagaragajwe n’ikibazo cy’amafaranga yatanzwe na Leta mu byitwaga CAPEC, ariko ubu Imirenge SAACOs ikaba ishyirwa ku gitutu ngo iyishyure MIGEPROF yari yayatanze.

Minisitiri Kanimba ubwo yavugaga ku kibazo cy’ubujura bwakozwe mu mirenge SACCOs yavuze ko hari imbogamizi z’uko Imirenge SACCO ari myinshi cyane, (416) bituma Banki Nkuru itabasha kuyigenzura 100%, ikindi ngo imikorere itarimo ikoranabuhanga ituma hatabaho igenzura rya buri munsi.

Kanimba ati “Amafaranga yanyerejwe ni menshi mu buryo bwinshi, ariko amenshi yibiwe mu mpapuro miliyoni 500 kuri miliyoni 600 zirenga.”

Kanimba yavuze umuti w’iki kibazo ari uguhindura imikorere no gushyiraho uburyo bw’igenzura imbere muri banki, ngo kuko hari abenshi bumva ko bazatwara amafaranga bagatinda gufatwa bitewe n’uko igenzura rizakorwa bitinze.

Yagize ati “Mu kigo cy’imari iyo hataraye hakozwe igenzura ngo hamenyekane ubujura bwakozwe kiba ari ikibazo. Gusa hari n’ubwo ugenzura imibare igahura, umujura ntamenyekane.”

Ku kibazo cy’amafaranga yatanzwe na Leta muri CAPEC, nyuma yo guhuzwa n’Imirenge SACCO ubu iyi mirenge SACCO ikaba ishyirwa ku gitutu cyo kwishyura umwenda itafashe kuko ngo amafaranga yariwe n’abantu bumva ko ari aya Leta.

Kanimba yavuze ko mbere yo guhuza ibi bigo habanje ubwumvikane no gukora igenzura(Audit), ubu ngo harimo gukorwa ibishoboka ngo abantu bariye ayo mafaranga bayishyure ntibizage ku mutwe w’Imirenge SACCO nubwo abadepite ukuri babonye kunyuranye n’ibyo.

Damien Mugabo umuyobozi w’Ikigo cy’Igihugu gishinzwe Amakoperative, na we wari witabye Komisiyo, yatanze imibare y’uko SACCO zateye imbere ariko anagaruka ku kibazo cy’ubujura buvugamo kuva mu 2009 zitangira gukora kugera mu kwezi kwa Nyakanga 2015.

Mugabo Damien yavuze ko amafaranga SACCO zagurije abantu agera kuri miliyari 121 mu myaka ine cyangwa itanu ishize, muri aya mafaranga ngo miliyari 90 yamaze kwishyurwa, ibi ngo bitanga ikizere ko za SACCO hari impinduka zagize mu gihugu.

Mugabo yavuze ko mu mwaka wa 2011 amafaranga abaturage bashyiraga muri SACCO ari miliyari 20, ariko mu igenzura ryakozwa tariki ya 31 Nyakanga 2015, amafaranga ashyirwa muri za SACCO yari ageze kuri miliyari 60.

Ubwo yatangaga imibare y’uko amafaranga yagiye yibwa mu Mirenge SACCO, Damien Mugabo yavuze ko muri miliyoni 600 zibwe mu myaka itandatu ishize, miliyoni 400 zibiwe mu mafishi.

Yavuze ko miliyoni 38 gusa arizo zimaze kugaruzwa, andi mafaranga ngo ibibazo byayo biri mu nkiko. Amafaranga yibwa za SACCO habayeho ubujura bwo kumena inzu ngo ni miliyoni 30 z’amanyarwanda.

Ibisobanuro bya Minisitiri byarangiye adasubije ibibazo byose yabajijwe n’abadepite, kuko yari afite indi nama, ariko abadepite bumvikanye ko abo bayobozi bazagaruka undi munsi bagasubiza ibyo bibazo byagiye bigaragara muri za SACCO mu gihugu.

HATANGIMANA Ange Eric
UM– USEKE.RW