Hashyizweho abantu 7 bagize Komisiyo yo kuvugurura Itegeko Nshinga

Kuri uyu wa 09 Nzeri 2015 Inama y’Abaminisitiri yari iyobowe na Perezida Kagame yashyizeho abantu barindwi bagize Komisiyo ishinzwe kunganira Inteko Ishinga Amategeko mu ivugururwa ry’Itegeko Nshinga rya Repubulika y’u Rwanda. Iyi Komisiyo iyobowe na Dr Augustin Iyamuremye usanzwe ayoboye urubuga nginshwanama rw’igihugu.

Ni nyuma y’uko Inteko Ishinga Amategeko y’u Rwanda yemeje ishingiro ry’ubusabe bw’abaturage miliyoni eshatu zirenga basabye ko Itegeko Nshinga rivugururwa cyane cyane mu ngingo yaryo ya 101 yari isanzwe ibuza umukuru w’igihugu kurenza manda ebyiri.

Tariki 19/08/2015 nibwo abadepite bemeje itegeko rishyiraho Komisiyo izavugurura Itegeko Nshinga, bagena ko abagize iyi komisiyo bazemezwa na Perezida wa Republika, bakaba atari bamwe mu basanzwe bagize Inteko Ishinga Amategeko kandi iyi komisiyo ikazakora mu gicye cy’amezi ane.

Iyi komisiyo ishyizweho ngo yihutishe inozwa ry’ivigururwa ry’Itegeko Nshinga ryasabwe n’abaturage 3 784 586 bandikiye Inteko basaba ko ingingo ya 101 ivugururwa.

Aba bakomiseri bakazagena ibyo kuvugurura mu Itegeko Nshinga mbere y’uko habaho amatora ya Kamarampaka ari nayo abanyarwanda bazatora bemera cyangwa banga ibizaba bishingiye mu mushinga wo kuvugurura Itegeko Nshinga ugiye kunozwa n’iyi komisiyo.

Aba bemejwe kuri uyu wa gatatu muri iyi nama y’Abaminisitiri ni;

1. Dr. IYAMUREMYE Augustin, Perezida
   Uyu ni umunyapolitiki w’inararibonye muri Politiki y’u Rwanda, yakoze imirimo itandukanye y’ubwarimu ndetse n’ubuyobozi, ubusanzwe ni inzobere mu buvuzi bw’amatungo. Yigeze kuba Minisitiri w’Ububanyi n’amahanga. Asanzwe ari umuyobozi w’Urubuga ngishwanama rw’Igihugu, rugira inama Leta ku mitegekere y’Igihugu n’ubundi buzima bukomereye igihugu.
2. Dr. KAYITESI Usta, Visi Perezida
   Ni umunyamategeko n’umwalimu wigisha amategeko muri Kaminuza y’u Rwanda, yari umuyobozi ishami ry’amategeko muri iyi kaminuza mbere yo kugirwa Umuyobozi wa Koleji ya Kaminuza y’u Rwanda yigisha ubugeni na siyansi z’ubumenyamuntu i Huye. Asanzwe ari Komiseri muri Komisiyo y’igihugu yo kuvugurura amategeko.
3. Bwana MILENGE John
   Ni umunyamategeko uzwi cyane ku buyobozi bwa kompanyi ya Leta y’u Rwanda ya Rwandair, yigeze kuyobora Tristar Investments and Prime Holdings. Akaba yarize amategeko muri Uganda.
4. Bwana HAVUGIYAREMYE Aimable
   Ni umunyamategeko akaba n’umuyobozi w’ikigo ILPD kigisha iby’amategeko gitegura abanyamategeko barangije kaminuza kwinjira mu mwuga.
5. Bwana UWIZEYIMANA Evode
   Nawe ni umunyamategeko wamenyekanye cyane ku maradio mpuzamahanga akora ubusesenguzi kuri politiki y’u Rwanda. Yaje gutaha mu Rwanda mu ntangiriro za 2014 agirwa umuyobozi mukuru wungirije muri Komisiyo yo kuvugurura amatekeko y’u Rwanda.
6. Madamu MUKESHIMANA Beata
   Beata nawe yize amategeko, Umuyobozi mukuru w’ishami (Department) rishinzwe ubushakashatsi no kuvugurura amategeko muri Komisiyo y’igihugu yo kuvugurura amategeko.
7. Madamu BAMWINE Loyce
   Bamwine nawe ni umunyamategeko usanzwe akuriye agashami (division) k’ubushakashatsi no kuvugrura amategeko muri Komisiyo y’igihugu yo kuvugura amategeko.

Indi myanzuro y’inama y’Abaminisitiri ikubiye mu itangazo ryashyizwe ku rubuga rw’ibiro bya Minisitiri w’Intebe.

UM– USEKE.RW