Isoko rya Kabeza ryahise rifungurwa amasaha macye rimaze gufungwa na RRA

Mu gitondo cyo kuri uyu wa 26, isoko rya Kabeza ryafunzwe n’ikigo cy’Igihugu gishinzwe imisoro n’amahooro kubera imyenda kiberewemo na rwiyemezamirimo w’iri soko. Ahagana ku isaha ya saa tanu ni bwo iri soko rifunguwe impande zombi zimaze kumvikana uko iyi misoro yakwishyurwa.

Kuva mu gitondo; Abacuruzi bakorera muri iri soko rya Kabeza bari baheze inyuma y’imiryango y’iri soko ndetse bagaragaza ko batishimiye iki cyemezo bavuga ko “batuwe hejuru”, bakavuga ko baje bagasanga hafunze ndetse hamanitse itangazo rigaragaza ko iri soko ryafunzwe kubera imisoro Rwiyemezamirimo Louis Aboyezantije (watsindiye iri soko) abereyemo RRA.

Ku isaha ya Saa tanu n’iminota micye; ni bwo umuyobozi w’akarere ka Kicukiro; Paul Jules Ndamage yageze aha asaba ababishinzwe kurifungura ababwira ko inzego z’ubuyobozi zimaze kumvikana n’ikigo cy’Igihugu gishinzwe imisoro n’amahooro hakaba hashakwa uburyo cyakwishyurwa ariko abaturage ntibahagarikirwe imirimo y’uburuzi ibatunze.

Ni inkuru yakiriwe neza n’aba bacuruzi ariko bakavuga ko ibyabakorewe (gufungirwa isoko) byabababaje kuko batari bazi ko hari ibibazo rwiyemezamirimo watsindiye iri soko bakoreramo yaba afitanye n’undi muntu cyangwa ikigo runaka.

Uwamahoro Jacqueline ucururiza imboga muri soko; yagize ati “ …nta kibazo cy’imisoro twari dusanzwe tuzi; none se ko dusora; nta kosa na rimwe dufite, twari tuzi ko imisoro dutanga igera kuri Rwanda Revenue, yari itaragera hano ngo inatubwire uko ikibazo giteye.”

Umunyamabanga Nshingwabikorwa w’Umurenge wa Kanombe; Murenzi Donatien avuga ko n’ubwo atabihagaraho hari amakuru avuga ko uyu rwiyemezamirimo yaba afitiye iki kigo umwenda wa miliyoni zigera muri 200.

Murenzi Donatien avuga ko ubwo yageraga kuri iri soko ryari ryafunzwe abari barifunze bamubwiye ko rwiyemezamirimo Louis Aboyezantije yagaragaje ko adashaka kwishyura iyi misoro abereyemo ikigo cy’igihugu gishinzwe imisoro n’amahooro.

Uyu muyobozi w’Umurenge wa Kanombe avuga ko ntako atagize ngo harebwe uko iri soko ryafungurwa gusa ngo ijwi rikamubana rigufi bigatuma yitabaza inzego zimukuriye ari bwo umuyobozi wa Kicukiro yahise avugana na komiseri mukuru wa RRA.

Murenzi uyobora Umurenge iri soko riherereyemo avuga ko ikigiye gukorwa nk’uko byumvikanyweho ari ugushaka Louis Aboyezantije akishyura iyi misoro ku neza bitaba ibyo hakaba hakwitabazwa imbaraga zishingiye ku mategeko nko guteza cyamunara imitungo ye.

Aba bacuruzi batagaragaza neza icyo bahombye; bavuga ko kuba bari basanzwe batangira akazi saa 07h30 bakaba bafunguriwe amasaha yegera saa sita hari ababigiriyemo igihombo nk’abacuruza imboga (bari bavuye kurangura) zumye kubera izuba bari bicayeho ubwo bari bahejejwe hanze.

Abajijwe uburyo yakiriye kuba bafunguriwe; Hitimana Yohani usanzwe ucuruza ifu muri iri soko; yagize ati “tuyakiriye neza ariko ikibazo ni uko amakuru bagenda bashyira abantu ni uko ngo kuwa mbere hazakorwa cyamunara.”

Iyi gahunda yo gufungira abakibeyemo imyenda y’imisoro; ikigo cy’igihugu gishinzwe imisoro n’amahooro giherutse kuyisubukura kuwa 12 Kanama ubwo cyafungaga bimwe mu bigo byigenga kubera ibirarane by’imisoro.

Photos/M.NIYONKURU/Umuseke

Martin NIYONKURU
UM– USEKE.RW