Rubavu: Ikibazo cyo kubura irimbi kirabakomereye

Mu murenge wa Rubavu mu karere ka Rubavu abahatuye barasaba ubuyobozi kubashakira aho bashyingura ababo kuko ubu cyabaye ikibazo gikomeye. Ubu ngo abantu barashyingura mu mirima ku bwumvikane na ba nyirayo maze ntibashyireho umusaraba kugira ngo nyirayo akomeze yihingire nta kibazo.

Felicien Migambi utuye ku musozi wa Rubavu uri mu bimuwe mu ishyamba rya Gishwati avuga ko nta rimbi bafite.

Ati “Tumaze imyaka irenga itanu twimuriwe hano ariko ntabwo tweretswe aho twashyingura abacu, twumvikana n’umuntu ufite umurima akaguha ahantu hato ushyingura ariko akagutegeka kudashyiraho umusaraba kuko aba akeneye guhinga ahantu hatitwa mu irimbi.”

Aba baturage bavuga ko bibababaza kuba badafite aho bashyingura cyangwa gushyingura ababo mu buryo nk’ubwo mu mirima y’abandi bantu.

Mediatrice Uwimana wo mu kagari ka Gikombe umurenge wa Rubavu avuga ko bamaze igihe kinini basaba ubuyobozi kubashakira irimbi ariko butabumva kugeza ubu.

Jeremie Sinamenye Umyobozi w’Akarere ka Rubavu avuga ko iki kibazo bakizi kandi ko bari kurebera hamwe uburyo babona ahazashyirwa irimbi muri kariya gace.

Si mu murenge wa Rubavu gusa kuko na Cyanzarwe na Rugerero naho bavuga ko bafite icyo kibazo nabo bakaba basaba guhabwa irimbi rikwiriye.

Gushyingura mu Rwanda hari abatangiye kubibonamo ikibazo kuko uko abantu bapfa bagashyingurwa mu butaka batwara ubuso runaka kandi bugenda buba bunini uko iminsi ishira, nyamara ubuso bw’igihugu bwo ntibwiyongera.

Itegeko ubu ryemerera abantu gushyingura imibiri y’ababo bayitwitse bakabika ivu. Gusa imyumvire y’abanyarwanda kuri ubu buryo bushya bwo gushyingura ntiracengera, gusa uko iminsi ishira birashoboka ko abanyarwanda bazisanga aribwo buryo bukwiriye.

Patrick MAISHA
UM– USEKE.RW/Rubavu