Abakozi ba MINISANTE n’Umuvugizi wayo bari bafunze barekuwe

Updates: Amakuru agera k’Umuseke ni uko aba bakozi ku mugoroba wo kuri uyu wa mbere abandi bakozi babiri ba MINISANTE barekuwe barimo na Nathan Mugume umuvugizi wayo. Umwe ngo niwe usigaye ugikurikiranywe afunze.

Bose hamwe bari abakozi icyenda bafunze, kuri uyu wa mbere Alain Mukurarinda Umuvugizi w’Ubushinjwacyaha bw’u Rwanda yabwiye Umuseke ko batandatu muri bo ubu barekuwe ngo bikomereze akazi n’ubwo yirinze gutangaza amazina yabo. Abandi batatu baracyakurikiranwa.

Aba bakozi bari bafunzwe kuva mu matariki 20/07 bakekwaho ibyaha birimo gutanga amasoko ya Leta binyuranyije n’amategeko no kunyereza ibya rubanda.

Alain Mukurarinda yavuze ko abarekuwe bazakomeza akazi kabo bisanzwe, avuga ko babiri bagomba kuburanishwa naho umwe na we uri hanze akaba agikorwaho iperereza.

Umuseke wabashije kumenya ko mu barekuwe harimo; John Jovith Maridadi Technical assistant UNICEF to RBC/RHCC,  Fulgence Kamali wari umukozi mu by’itangazamakuru muri RBC/RHCC, n’uwitwa Papias wari umucungamari muri CAMERWA. Nyuma y’iperereza aba bakaba ngo ari abere ndetse bari bukomeze imirimo yabo.

Mu bakiri gukurikiranwa bafunze ku byaha bashinjwa harimo Nathan Mugume umuyobozi w’ishami rishinzwe itangazamakuru y’ubuzima (Rwanda Health Communication Center Division, RHCC) akaba n’umuvugizi mukuru wa MINISANTE. Gusa uyu nawe akaba yaje kurekurwa ku mugoroba wo kuri uyu wa mbere.

Byari biteganyijwe ko aba bitaba Urukiko kuri uyu wa mbere bakazaburana kuwa gatatu tariki 05/08/2015.

Ku mugoroba wo kuri uyu wa mbere ariko amakuru Umuseke wamenye ni uko abari basigaye bafunze nabo barekuwe ngo bakurikiranwe bari hanze.

Daddy Sadiki RUBANGURA
UM– USEKE.RW