Nubwo mpembwa macye, ndi Umukire mu buhinzi- Museveni

Mu ruzinduko yagiriye mu karere ka Bukede; Perezida Yoweri Museveni yabwiye Abaturage bari baje kumwakira ko adatewe ipfunwe no kuba ahembwa umushahara muto kuko mu buhinzi n’ubworozi bye abikuramo agatubutse.

Ku rutonde rwashyizwe hanze na “The Africa Review “ mu cyumweru gishize; perezida Museveni yaje mu myanya ya nyuma mu baperezida bahembwa umushahara muto ku mugabane wa Afurika.

Ubwo yaganirizaga abaturage b’i Bukede, Museveni yagize ati “ nubwo ninjiza macye mu bituruka muri Guvrinoma, ndi umukungu,…ndi umukungu mu bituruka mu buhinzi.”

Muri uru ruzinduko rw’iminsi ibiri, Museveni yahamagariye urubyiruko guha agaciro ubuhinzi, ati “ mwe rubyiruko nimbabwira ko ubuhinzi ari ubukire mba mbabwira ibyo nzi.”

Museveni yibukije abaturage bo muri aka gace ko ibyo bakora byose bagomba guharanira amahoro nk’umusingi w’iterambere nk’uko bitangazwa na NewVision.

Ati “dukeneye kubungabunga amahoro, amajyambere n’ubukungu kuko turamutse tuvuze amajyambere gusa dushobora kugira imihanda myiza ariko ubukene nabwo bukaba buri hafi y’iyo mihanda.”

Yanahamagariye aba baturage kwirinda kunywa ibiyobyabwenge kuko byangiza ubuzima. Ati “ jye simbinywa kuko ibiyobyabwenge ni uburozi kuri njye.”

Aboneraho no kuburira urubyiruko runywa itabi ko bishobora kubaviramo kubura ubuzima bakiri bato.

Ku bijyanye n’ikibazo cyo kutagira imirimo ku rubyiruko; Museveni yavuze ikibazo ari uko uru rubyiruko ruba rudafite ubumenyi.

Ati “amajyambere ashingiye ku bintu bine, muri byo harimo ubuhinzi; nuramuka usoje amasomo yawe ntubone akazi jya mu buhinzi kuko najye ndi umukire kandi mbikesha ubuhinzi.”

Uyu mugabo ukunze gutanga ubutumwa bukomeye ariko akifashisha amagambo asa nko gutebya amaze imyaka 29 ku butegetsi ndetse akaba aherutse gutangaza ko agifite integer zo gukomeza kuyobora Uganda.

Martin NIYONKURU
UM– USEKE.RW