Muhanga: Umuvugabutumwa Jennifer ngo ababazwa n’uko Se yapfuye atazi Imana

Mu giterane  cyateguwe n’umuryango mpuzamahanga w’ivugabutumwa, Wildi Jennifer, Umuyobozi wawo yavuze ko  kuba se yaritabye Imana adakikijwe  byamuteye agahinda n’umubabaro  ku buryo  byatumye afata icyemezo cyo kwiyegurira  Imana akoresheje ubutunzi  bwe.

Iki giterane cy’ivugabutumwa cyaberaga mu karere ka Muhanga kuva taliki ya 23-26 Nyakanga 2015, mu buhamya  umuvagabutumwa Wildi Jennifer  yatanze  yagarutse ku mibereho  yagize  mbere na nyuma y’urupfu rwa se umubyara.

Yavuze ko se yari umucamanza muri Leta ya California, muri Leta zunze ubumwe za Amerika, ariko adakijijwe agahora atoteza nyina, ndetse na musaza we bavukana.

Jennifer avuga ko  nta kintu kibaho umuryango we wifuje ngo ukibure, ariko  ko nta mahoro bigeze bagira muri icyo gihe cyose, bitewe n’ingeso mbi y’ubusinzi se yagiraga.

Ibindi bikomeye byamuteye agahinda ngo ni uko  se atigeze amenya Imana cyangwa se ngo yakire  Yesu  amubere Umwami n’umukiza w’ubugingo bwe,  kugeza yitabye Imana, noneho akavuga ko  nawe yaje gufata icyemezo  amaze gukura cyo kwigira  mu bikorwa bibi, byo gukina za filimi  ziteye isoni, agera nubwo aba ikirangirire  ku isi hose, ariko ngo na we yari ataramenya Imana.

Uyu muvugabutumwa  avuga ko  iki gikorwa kibi cyatumye abasha kugira amafaranga menshi ariko adafitemo  amahoro n’umudendezo, gusa ngo nyuma y’imyaka myinshi  yaje kugira amahirwe yo kwakira agakiza areka uwo murimo  atangira kuvuga ijambo ry’Imana  hirya no hino ku isi ari na ko akoresha ubutunzi bwe.

Yagize ati: “Uwababwira ngo musabe Imana icyo mushaka mwayisaba iki? Ntekereza ko mwayisaba u Rwanda  ruzamuka ruzi Imana.”

Baho Isaie Umuhuzabikorwa  w’iki giterane, avuga ko  ingengo y’imari yakoreshejwe mu giterane, iyose Jennifer yasabye ko yayitanga wenyine kubera ko ngo hadakwiye kubaho umuntu wakwa amafaranga yo gufasha ivugabutumwa kuko ngo bitanga isura  itari nziza cyane ku bantu batari bakizwa.

Usibye  ivugabutumwa, muri iki giterane hanabayemo gutombola amagare.

MUHIZI ELISEE
UM– USEKE.RW-Muhanga