Obama yatumiye Buhari wa Nigeria ngo baganire

Kuri uyu wa mbere Perezida Muhammadu Buhari wa Nigeria aratangira uruzinduko rw’iminsi ine muri Leta zunze ubumwe za Amerika. Aha, azagirana ibiganiro na Perezida Obama wamuhaye ubu butumire, bivugwa ko ikibazo cya Boko Haram kizaba kiri ku murongo w’ibanze w’ibiganirwa.

Perezida Buhari ataratorwa na nyuma yo gutorwa yatangaje ko kurandura Boko Haram aricyo kintu kihutirwa agiye gukora. Gusa kuva yarahirira kuba Perezida mu mezi abiri ashize abanya-Nigeria bagera kuri 700 bamaze kugwa  mu bitero by’ubwiyahuzi bya Boko Haram.

Amerika ngo irashaka kongera ubufatanye n’inzego z’ubutasi za Nigeria n’iza Amerika nk’uko byattangajwe na  Lauren Ploch Blanchard witwa inzobere mu by’ibireba Africa mu kitwa Congressional Research Service cy’i Washington.

Umwaka ushize Perezida Goodluck Jonathan yari yanenze Amerika ko inkunga yemereye Nigeria yo kurwanya Boko Haram itari ihagije.

Obama na Buhari ngo baraza kuganira kuri ubu bufatanye bundi bushya mu kurwanya umutwe wa Boko Haram ugaruka buri gihe mu makuru ko wamennye amaraso muri iki gihugu.

Petrol ya Nigeria ngo ntiyabura muri ibi biganiro

Lauren Blanchard akomeza avuga ko byanze bikunze Buhari na Obama bazanaganira ku bufatanye mu by’ubukungu harimo no kubaka inganda zicukura zikanatunganya Petrol muri Nigeria.

Mbere ya 2012 Nigeria yahaga Petrol yayo nyinshi USA gusa ubu isoko ryayo rinini riri muri Aziya

Buhari ntazaganira na Obama gusa kuko ngo azanabonana na n’ushinzwe ububanyi n’amahanga bwa Amerika John Kerry cyangwa se na Visi Perezida Joe Biden.

UM– USEKE.RW