u Rwanda mu bihugu bine bya mbere bitarimo ruswa muri Africa

Raporo y’umushinga wa banki y’isi wo kugaragaza ibiranga imiyoborere mu bihugu by’isi, yasohotse muri iki cyumweru yerekanye ko u Rwanda ruri mu bihugu bine bya mbere muri Africakurwanya ruswa ku buryo bufatika mu gihe kiri hagati ya 1996 – na 2010.

Iyi Raporo ya World Bank Worldwide Governance Indicators (WGI) project igaragaza ko u Rwanda ruza ku mwanya wa kane n’amanota 70.8%, rukaza inyuma y’ibirwa bya Maurices biza ku mwanya wa gatatu n’amanota 73.2%, Cap Vert ku mwanya wa kabiri n’amanota 76.6% ndetse na Bostwana iza ku mwanya wa mbere muri Africa na 79.9%

Iyi raporo igaragaza ko u Rwanda kimwe n’ibi bihugu byambere byagaragaje umuhate mu kurwanya ruswa nka kimwe mu biranga imiyoborere myiza.

Iki kigereranyo cya Banki y’isi mu miyoborere iganisha ku iterambere cyerekana ko kuva mu 1996 kugeza mu 2010 kigaragaza ko mu Rwanda no muri biriya bihugu biza imbere ruswa yagabanutse ku buryo bugaragara nkuko bivugwa n’uriya mushinga.

u Rwanda kuza mu myanya myiza mu kurwanya Ruswa, waba ari umusaruro utangwa n’Urwego rw’Umuvunyi mu gihugu rushinzwe gukumira no kurwanya Ruswa n’akarengane.

Nubwo uru rwego hari byinshi rutarageraho kuko hari hamwe mu hacyumvikana ruswa nko mw’itangwa ry’akazi (Raporo ya Transparency Rwanda) ndetse n’akarengane hamwe na hamwe, ariko hari intambwe yatewe muri gahunda zitandukanye z’uru rwego rw’Umuvunyi, zirimo no gusanga abaturage mu turere iwabo ngo babwire Umuvunyi iby’akarengane bagiriwe cyangwa ruswa aho ivugwa.

Iyi raporo y’umushinga wa Banki y’isi, kandi ugaragaza ibindi bipimo bitandatu by’imiyoborere mu bihugu bitandukanye ku isi, aribyo; Ubwisanzure no kubazwa ibyo ushinzwe, Ubuyobozi buhamye n’ikigero cy’urugomo mu gihugu, Ubushobozi bwa Leta, Igipimo cyo gukurikirana ibibera mu gihugu, Igihugu kigendera ku mategeko ndetse no kurwanya ruswa.

Muri ibi birango (Governance indicators) bitangwa n’uriya mushinga wa Bank y’isi, mu bwisanzure no kubazwa ibyo ushinzwe u Rwanda rufite amanota make muri iyi myaka 10 ishize dore ko ruri hagati ya 20 na 15%.

Naho ku kirango Ubuyobozi buhamye n’ikigero cy’urugomo mu gihugu u Rwanda rufite amanota atari mabi  kuko ruri ku kigereranyo cyo hagati ya 45 na 50% rwaravuye munsi y’10% mu 1996.

Ku kirango cy’ubushobozi wa Leta (Government Effectiveness) u Rwanda rufite amanota 61%, aha naho bigaragara ko rwazamutse rukava kuri 12% mu 1996.

Ku bijyanye na Leta igendera ku mategeko u Rwanda rufite ikigereranyo cya 49%. Mu kurwanya ruswa akaba ari ho bigaragara ko u Rwanda rufite amanota meza 70.8%, ari nayo nyine aruhesha umwanya wa kane muri Africa.

Ushingiye kuri imibare itangwa n’uriya mushinga wa Bank y’isi bigaragara ko hari intambwe igaragara imaze guterwa mu kubaka Imiyoborere myiza iganisha ku iterambere mu gihugu cy’u Rwanda, nubwo kandi inagaragaza ko hakiri intambwe nini yo guterwa kuko hari aho u Rwanda rukiri inyuma kuri biriya birango by’imiyoborere mu bihugu by’isi byasohotse muri iki cyumweru dusoza.

JP Gashumba
UM– USEKE.COM