Burundi: Amashyaka arwanya Leta yumvikanye kwamagana amatora

Kuri uyu wa gatanu; Amashyaka atavuga rumwe na Leta y’u Burundi yahurije hamwe atangaza ko atazitabira amatora yose ateganyijwe kuba muri iki gihugu mu gihe yaba atigijwe inyuma kubera umutekano mucye ukomeje kuhagaragara muri iyi minsi yegereje igihe cy’amatora.

Ibi byatangajwe na Charles Nditije; umwe mu bayobozi b’amashyaka atavuga rumwe na Leta y’u Burundi wabitangarije Ibiro Ntaramakuru by’Abafaransa AFP.

Ibi bibaye mu gihe muri iki gihugu; kuwa Mbere w’icyumweru gitaha hateganyijwe amatora y’abagize inteko ishinga amategeko.

Charles Nditije yagize ati “ abatavuga rumwe na Leta twese twahurije hamwe twanzura ko tutakitabiriye amatora yose yateguwe na CENI harimo n’ay’abagize inteko Ishinga ametegeko yagombaga kuba kuwa Mbere.”

Uyu mwanzuro w’abarwanya Leta ya Nkurunziza ukubiye mu ibaruha, ikaba yashyizweho imikono n’abayobozi b’amashyaka yose atavuga rumwe na Leta.

Mu mpera z’icyumweru gishize; no mu ntangiro z’iki; mu duce dutandukanye two mu mujyi wa Bujumbura no mu nkengero zawo hagiye hagabwa ibitero bya ‘grenade’ byahitanye abantu bane abandi barakomereka.

Ibi bikorwa Kimwe n’ibindi by’ihohoterwa bikomeje kubera mu Burundi, ni byo ntandaro y’uyu mwanzuro w’amashyaka atavuga rumwe na Leta nk’uko byatangajwe na Charles Nditije,

Muri iki cyumweru kandi; Visi Perezida wa kabiri w’u Burundi; Gervais Rufyikiri yahungiye mu gihugu cy’Ububiligi aho yavuze ko yahunze nyuma yo gukomeza guterwa ubwoba kuko yagaragazaga ko atifuza ko Petero Nkurunziza akomeza yakwiyamamariza gutorerwa kuyobora manda ya Gatatu.

Biravugwa kandi ko Umukuru w’Inteko Ishinga Amategeko y’u Burundi, Pie Ntavyohanyuma nawe yahungiye mu gihugu cy’u Bubiligi.

Perezida Pierre Nkurunziza we akomeje ibikorwa byo kwiyamamaza mu bice bitandukanye mu Burundi ndetse akaba akomeje gusaba Abarundi kumushyigikira bakazamutora akabayobora indi myaka itanu yonyine nk’uko akomeje kubicisha ku mbuga nkoranyambaga nka Twitter.

Martin NIYONKURU

UM– USEKE.RW