Tumba College ifatanya n’abikorera gutegura amasomo azigishwa

Mu cyumweru gishize itsinda rya Technical Advisory Group ryasuye ikigo cy’ishuri rya Tumba College of Technology mu rwego rwo kugirana inama mu gutegura amasomo hagendewe ku bikenewe ku isoko ry’umurimo.

Iri tsinda rigizwe n’abikorera rikaba ritanga inama mu byigishwa kugira ngo amasomo ajyane n’ibikenewe ku isoko ry’umurimo.

Mu kiganiro Umuseke wagiranye na Eng. Gatabazi Pascal yavuze ko Tumba College of Technology akenshi ihamagarira abikorera ku giti cyabo gukorana n’abanyeshuri barangije kugira ngo bumve ibikenewe ku isoko ry’umurimo.

Yagize ati “Iyo twigisha mu kigo, ibyo twigisha tubyita progaramu, ariko ku isoko ry’umurimo birahinduka buri munsi, ibi bidufasha kuvugurura muri twongeraho buri munsi ibijyanye n’isoko ry’umurimo.

Technical Advisory Group ni groupe iva mu bikorera iza kuduha inama, mu byo twigisha, kugira ngo turebe icyo twakwigisha bikenewe ku isoko ry’umurimo kuko ikoranabuhanga ihindagurika buri munsi.”

Eng. Gatabazi yakomeje avuga ko guhura na bo impamvu ari ukunoza imikoranire myiza na bo, kuko bifasha mu guhanga udushya twinshi, no kwimenyekanisha ku buryo ku banyeshuri guhabwa akazi  bizaba byoroshye.

Ibigo bikorana na Tumba college birimo Rwanda Energy Group (REG), mu myaka umunani ishize Tumba College ivuga ko hari byinshi byagezweho, muri byo harimo imikoranire n’izindi nzego yiyongereye, iki kigo gifite abarimu beza n’ibikoresho bihagije.

Eng. Gatabazi Pascal yongeraho ko nta munyeshuri arangije muri Tumba College umara umwaka hanze atarabona icyo akora.

Daddy SADIKI RUBAGURA
UM– USEKE.RW