Cyanika: Umujura uvuye Uganda yibye Forex Bureau afatwa n’abaturage

Ahagana saa cyena z’ijoro mu rukerera rwo kuri iki cyumweru, umujura uvuga ko aba i Kampala yateye bureau d’echange mu Cyanika yiba za miliyoni z’amashilingi n’amanyarwanda ariko afatwa n’abaturage agisohokamo.

Uwibye avuga ko yitwa Frank Nzavugankize kandi afite imyaka 23, kuwa gatanu ngo yaje mu Rwanda yinjira muri iyi bureau d’echange avunisha amafaranga macye, acunga uko umutekano waho urinzwe maze ngo aragenda agura akuma ko gukata ibati n’ipiki yo kumena ‘coffre fort’.

Mu gicuku cya none yaje aca hejuru ku mabati akata ibati yinjiramo atangira kumena ama coffre forts.

Umuzamu ukorera hafi aha ni we wamwumvise maze aterefona abantu batandukanye bazana n’abaturage maze bose bagota inzu yari arimo baramureka ariba ararangiza asohotsemo bahita bamucakira.

Uyu musore ngo yari atwaye miliyoni 22 z’amashiringi ya Uganda na miliyoni ebyiri n’ibihumbi Magana atanu birenga y’amanyarwanda.

Frank Nzavugankize, avuga ko avuka mu karere ka Gakenke mu murenge wa Mubuga, aha ariko ngo nta muryango akihagira.

Avuga ko yavuye mu Rwanda mu 2000 ajya i Kampala gucuruza telephone arahomba, maze ngo atangira kwiba za flat screen akajya azigurisha. Ibi ngo nibyo yakoraga i Kampala.

CIP André Hakizimana umuvugizi wa Police mu majyaruguru yavuze ko uwo mugabo nta cyangombwa na kimwe bamusanganye ku buryo batahita bemeza ko ari umunyarwanda.

Ashimira cyane ubufatanye bw’abaturage mu gikorwa bakoze cyao gufata uyu mujura n’uruhare mu kwirindira umutekano.

Ubujura nk’ubu mu ngingo ya 301 y’igitabo cy’amategeko ahana y’u Rwanda buhanishwa igifungo kuva ku mezi 6 kugera ku myaka ibiri, ariko CIP Hakizimana avuga ko kuko ari ubujura buciye icyuho ashobora guhabwa igihano gikubye kabiri iki.

Uyu mujura ubu afungiye kuri station ya Police ya Gahunga.

UM– USEKE.RW