Tumba College of Technology iri gusana mudasobwa zari zarajugunywe

Mu bigo bimwe byigenga na cyane cyane ibya Leta hari za mudasobwa nyinshi zijugunywa kuko zapfuye, nyamara ngo hari nyinshi muri zo ziba zarapfuye utuntu duto ariko zikajya mu bigomba kujugunywa bigatuma akayabo kazigenzeho gatakara kubera kutamenya ko zishobora gusanwa neza. Tumba Colege of Technology yatangije gahunda yo gusana za mudasobwa zo mu bigo bitandukanye ndetse muri week end ishize yashyikirije 76 yasubije ubushya mu bigo bine by’amashuri byari byarazihebye.

Eng Pascal Gatabazi umuyobozi wa Tumba College of Technology avuga ko iki gikorwa bagikora batagamije inyungu ahubwo ari umusanzu iri shuri ry’ikoranabuhanga riri gutanga mu kubaka ikoranabuhanga.

Eng Gatabazi avuga ko nyuma yo gusaba uburenganzira Minisiteri y’ibikorwa remezo bagiye mu bigo bitandukanye bafata imashini zari zarajugunywe kugira ngo zimwe muri zo bazisubize ubuzima zongere gukoreshwa zitange umusaruro aho kugira ngo hatangwe andi mafaranga yo kugura inshya.

Iki gikorwa ni ubwa mbere iri shuri rigikoze ubu bamaze gusana mudasobwa 396 zose hamwe zihagaze miliyoni 100 z’amanyarwanda.

Muri iyi week end ishize bagejeje ku bigo bine bya APEKI Tumba, Inyange Girls Secondary School, GS Nyirabirori na Kiyanza Secondary School za mudasobwa zari zarajugunywe ubu zasubijwe agaciro.

Anne Macharia umuyobozi w’ishuri ry’i Nyange Girls Secondary school yavuze ko iki ari igikorwa gikomeye bakorewe n’iri shuri rya Tumba College of Technology kuko bigiye gutuma ikibazo cy’abanyeshuri baburaga imashini zo kwigiraho cyongera koroha.

Daddy SADIKI RUBANGURA
UM– USEKE.RW