Amabanga 9 ku buzima bwa nyakwigendera Steve Jobs

Ni bake batamenye iby’urupfu rwa Steve jobs,56,  witabye Imana kuri uyu wa gatatu nijoro, azize cancer y’urwagashya.

Umuhanga mu ikorabuhanga, watangije uruganda rwa Apple, rukora mudasobwa, akagira uruhare rukomeye mu ikorwa rya iPod, iPhone na iPad benshi bazi.

Mu myaka myinshi y’ubuzima bwe, Steve Jobs ni umuntu wakundaga ko ubuzima bwe (Personal Life) butamenyekana hanze.

Benshi ntibari bazi uko abanye n’umuryango we, dore ko igihe kinini cy’umunsi we yakimaraga imbere ya mudasobwa. Benshi rero bagashaka kumenya inyuma ya Mac na iPhone uko yitwara.

1. Ubwana bwe

Yavutse mu 1955 I San Francisco. Se na nyina bamaraso bamubyaye ntibari bashoboye kumurera, ahabwa umuryango (Adoption) akiri uruhinja.

Se wa nyawe Abdulfattah John Jandali, ukomoka muri Syria, yamubyaye afite imyaka 18 gusa, nyina wa nyawe, Joanne Simpson, nawe yari umunyeshuri muto.

Amaze gukura nibwo yabanye na nyina w’ukuri ariko se ntibigeze babana.

2. Yataye ishuri

Uyu mugabo wahinduye byinshi mu ikoranabuhanga ku isi, ntiyigeze yiga kaminuza. Akirangiza amashuri yisumbuye (High School) muri Calfornia, yiyandikishije muri Reed College mu 1972, ariko ahamara igihembwe kimwe gusa, ahita areka ishuri kubera kubura amikoro n’amafaranga yishuri yasabwaga ababyeyi bamureraga.

Mu 2005, atanga ikiganiro muri Stanford University yagize ati: “Ntibyari binyoroheye, naryamaga hasi mu cyumba cy’inshuti kuko ntari mfite ubushobozi bwo kwishyura icumbi ry’ishuri, nakusanyaga amacupa ya Coke nkayacuruza kuma Cent 5 kugira ngo ngure icyo kurya”

3.  Yatangiriye kuri Jeux Video

Amafaranga menshi yambere yakoreye ni 750$, ubwo yakoraga design ya Jeux Video nubu izwi cyane muri USA yitwa Atari.  Yaje guhita azana mugenzi we Steve Wozniak (baje gutangizanya uruganda rwa Apple) ngo ajye amufasha aka kazi. Baza guhembwa 5000$, ariko agahemba mugenzi we Wozniak 375$ kuko ari we wamwizaniye.

4. Umugore asize bake nibo bari bamuzi

Mu buzima bwe ntiyigeze ashaka ko abantu babona umugore we. Ariko umugore we yari Laurence Powel, wize muri Kaminuza ya Pennsylvania.

Steve Jobs, yavuze uburyo bakundanye. Avuga ko mu 1988 yari afite inama ya business, maze aribwira ati: “niba iri joro ariryo ryanjye ryanyuma ku isi, ndimare mu nama ya business cyangwa nigire kureba uwo nkunda mbimubwire?” aha ngo yahise afata akamodoka yatwaraga asaba Laurence ko basangira Dinner, maze aremera. Kuva ubwo bari bakiri kumwe.

5. Mushiki we ni umwanditsi rurangiranwa

Mu buzima bwe amaze gukura, yaje guhura na mushikiwe wa nyawe (biological sister) ariho ashakisha ababyeyi be. Mona Simpson, ni umwanditsi uzwi cyane w’igitabo kitwa ‘Anywhere But Here’

Amaze guhura na musaza we, babaye inshuti zikomeye. Steve Jobs yabwiye New York Times ko uyu mushiki we ari inshuti ikomeye agira mu buzima. Mona Simpson nawe yamutuye igitabo cye gikunzwe cyane, ” Anywhere But Here is dedicated to “my brother Steve.”

6.Yigeze gukundana n’umuririmbyikazi

Imwe mu nshuti ye biganye mu mashuri yisumbuye niwe watangaj eko Stve Jobs yigeze gukundana na Joan Baez, umwe mu baririmbyi bazwi muri Amerika. Bizwi kandi ko Jobs mu busore bwe yajyaga asohokana na Diane Keaton, umukinnyi w’amafilimi uzwi.

7. yihakanye umukobwa yabyariye mu mashuri yisumbuye

Ku myaka 23, Steve Jobs yateye inda Chris Ann Brennan, umukobwa biganaga. Umukobwa we Lisa Brennan yavutse mu 1978, ariko se ntiyamwemeye mpaka mu nkiko, aho yavugaga ko atabyara. Nyuma y’igihe yaje gusaba imbabazi Chris Ann aza no kurihira umukobwa wabo Lisa ishuri rya Havard University rikomeye cyane ku isi. Uyu mukobwa we wambere yaharangije mu 2000 ubu ni umunyamakuru.

8. imyemerere ye, gukoresha ibiyobyabwenge no kwivura Cancer

Yigeze kubwira Bill Gates ko Microsoft ari nto (Narrow), aba bakaba bari abakeba be bakomeye. Yigeze kandi gukekwaho gukoresha ibiyobyabwenge.

Steve Jobs kandi ubwo yabagaho nta Mana yizera, yaje kujya mu Buhinde, aza kuhava yayobotse idini rya Boudha. (Buddhism)

Uyu mugabo ntiyaryaga inyama, uretse ifi. Yizeraga ko imiti gakondo yo mu burasirazuba bw’isi ikiza. Yagerageje kwivura Cancer ayikoresha, nubwo byamuviriyemo kubagwa Cancer yo munda mu 2004.

9. Umutungo we

Nubwo yari umukuru w’uruganda rukomeye cyane ku isi y’ikoranabuhanga, Steve Jobs, ntiyakundaga kwigira umuherwe cyane. Yinjizaga kuri conti ye Miliyoni imwe mu madorari ku mwaka. Hasi cyane ugereranyije na Bill Gates, Larry Page, Sergey Brin n’abandi bakora nkibye.

Akiriho yavugaga ko imigabane ye muri Apple ari Miliyoni 5.5$, nyamara amaze gupfa basanze imigabane ye ihabwa agaciro ka Miliyoni 377$

Umutungo we wose ubu ngo urabarirwa muri Miliyari 8.3$  (8.3$ Billion) nubwo ntawabikekaga bitewe n’uburyo yacishaga make kuri Forbes ivuga abaherwe. Akaba nyamara ngo yari umuntu w’110 mu bantu akize ku isi yose. Iyo kandi ngo ataza kugurisha imigabane ye muri Apple mu 1985 (mbere yo kuyigarukamo mu 1996) ubu ngo aba ari muri 5 bambere bakize ku isi yose.

Jobs akaba asigiye umugore we Laurence Powel Jobs abana batatu Reed, Erin, na Eve Jobs ndetse nyine n’uriya wambere yabyaye ku ruhande Liza Brennan nawe wafashe izina rya Jobs amaze kumwemera.

Source: Tacca Magazine

Jean Paul Gashumba
UM– USEKE.COM