Musanze: 14 muri 16 baregwa gukorana na FDLR bakatiwe, 2 bagirwa abere
Umutwe wa FDLR ushinjwa ibikorwa by’ubwicanyi ku baturage bo muri Congo aho ukorera
Urukiko rukuru urugereko rwa Musanze kuri uyu wa kane rwasomeye abantu 16 bari bakurikiranyweho gukorana n’umutwe w’inyeshyamba wa FDLR ku byaha byo kwinjiza no gutunga intwaro mu buryo butemewe n’amategeko. Babiri muri bo bakatiwe gufungwa burundu, abandi babiri bagirwa abere naho abasigaye bakatirwa hagati y’imyaka itanu na 20.
Isomwa ry’uru rubanza ruregwamo Nzirorera na bagenzi be 15 ryakozwe mu mvura nyinshi, Urukiko rwahanishije igifungo cya burundu Rugenera Jean Damascene na Harerimana Eric alias Kibamba nyuma yo gusanga bahamwa n’ibyaha bari bakurikiranyweho nta n’impamvu yo kubagabanyiriza ibihano kuko baburanye batsemba ibyo baregwa birengagije ibimenyetso bifatika bibashinja.
Urukiko kandi rwahanishije Ntibanyemera Patrice, Uwingabo Intime alias Ayinga na Unyuzimfura Jean Pierre igifungo cy’imyaka 20 nyuma yo guhamwa no gufatanya na FDLR.
N’ubwo Nzirorera afatwa nk’inkingi muri uru rubanza Urukiko rwasanze we na mugenzi we Ncogozabahizi Fidel bari bakwiye igifungo cya burundu ariko kuko baburanye bemera icyaha ku buryo budashidikanywaho Urukiko rubagabanyiriza igifungo bahanishwa imyaka 15.
Ruhangaza Aimable n’ubwo yakabaye ashyirwa mu gatebo kamwe na Nzirorera urukiko rwasanze uruhare rwe ari ruto ugereranije n’urwa Nzirorera kuko bose baburanye bemera icyaha ku buryo budashidikanywaho bityo hamwe Hakizimana Laurien ndetse na Habanabakize Jean Chrisostome alias Mapine bahanisha igifungo cy’imyaka 10.
Rushingiye kandi ku kuba Barisesa Jonas alias Boringo, Uwimana Fabien Alias Nsenga na Habyarimana Phenias Alias Focus ndetse na Simpenzwe J.Claude kuba icyaha kibahama kitarateje ingaruka zikomeye ndetse ari nabwo bwa mbere bagejejwe imbere y’Urukiko byatumye bagabanyirizwa igifungo maze kiva ku mya 15 kiba imyaka itanu.
Naho Ndengejeho Said na Munyemanzi Chemi Urukiko rwasanze nta bimenyetso bifatika bibahamya ibyaha baregwa bityo rubagira abere ndetse rutegeka ko nyuma y’isomwa ry’urubanza barekurwa.
Urukiko rwategetse ko abahamwe n’icyaha basonerwa amagarama y’urubanza kuko bafunze.
Aba 16 bakaba bakatiwe nyuma y’uko kuwa 12 Gashyantare 2015 abandi 12 nabo bari bakurikiranyweho ibyaha bisa n’ibi bakatiwe.
Umutwe wa FDLR ni umutwe uvuga ko urwanya Leta y’u Rwanda ukorera mu burasirazuba bwa Congo, ushinjwa uruhare rutaziguye mu bikorwa by’iterabwoba birimo gutera za grenade ahatandukanye mu gihugu.
Placide HAGENIMANA
UM– USEKE.RW
English